VOAL - Online Zëri i Shqiptarëve - SHBA E NGRE STATUSIN E ZYRAVE TË OPOZITËS SIRIANE

Administrata e Presidentit Obama ka thënë se do të njohë zyrat e grupit kryesor opozitar sirian në Uashington dhe Nju Jork si misione të huaja diplomatike.

Zyrtarët amerikanë njohën Koalicionin Kombëtar Sirian si përfaqësues legjitim të popullit sirian në dhjetor të vitit 2012, por zyrat e këtij koalicioni në Shtetet e Bashkuara deri dje ishin njohur vetëm si zyra ndërlidhëse.

Shtetet e Bashkuara thonë gjithashtu se do të shtojnë ndihmat humanitare për opozitën me 27 milionë dollarë, duke rritur ndihmën e përgjithshme amerikane për opozitën, e cila po lufton për përmbysjen e presidentit Bashar al-Asad, në 287 milionë që nga fillimi i konfliktit tre vjet më parë.

Ky përmirësim i statusit të zyrave të opozitës është kryesisht simbolik, por zyrtarët amerikanë thonë se kjo ka qenë një kërkesë kyçe e opozitës siriane, sepse ajo beson se do të ketë prani më të madhe dhe besueshmërinë e zyrtarëve në Uashington dhe të emigrantëve sirianë në Shtetet e Bashkuara.

Njoftimi i djeshëm vjen në fillim të një vizite në Uashington të një delegacioni të opozitës siriane të kryesuar nga Ahmed Jarba, president i koalicionit. Ai të enjten do të takohet me Sekretarin e Shtetit John Kerry.za