"Në qoftë se nisemi nga logjika se nuk është realizuar Marrëveshja e Ohrit dhe duhet ta hedhim poshtë, unë nuk jam dakord, sepse si konventat, si protokollet ndërkombëtare, si Marrëveshja e Ohrit, janë armë e fuqishme në duart e shqiptarëve, dhe ti hedhim këto armë, ne bëjmë punën e atyre që nuk na e duan të mirën...", thotë Bardhyl Mahmuti, kryetar i BDSH-së
Bashkimi Demokratik Shqiptar në zgjedhjet e 5 qershorit garon me të ashtuquajturën Platformë për Antidiskriminim. Platforma kryesisht mbështetet në konventat ndërkombëtare për të drejtat e njeriut dhe Marrëveshjen e Ohrit. Kryetari i kësaj partie Bardhyl Mahmuti, kërkon ridefinimin e Maqedonisë si shtet binacional dhe sistem sovraniteti nga poshtë lartë, kurse Kushtetutën e tanishme e konsideron si unitariste dhe gjenerator krize.
KOHA: Z. Mahmuti BDSH në këto zgjedhje garon me Platformën për Antidiskriminim. Pse e keni quajtur pikërisht kështu?
Mahmuti: Sa i përket pjesës historike të platformës tonë, ne kemi vënë theksin se gjatë periudhës komuniste shqiptarët kanë qenë të përballur me një politikë që ka synuar gjenocidin dhe etnocidin. Kërkojmë nga institucionet e reja të Maqedonisë, që do të dalin pas 5 qershorit që të dënohet publikisht periudha e terrorit dhe dhunës në komunizëm ndaj shqiptarëve. Që nga kapërcimi i Maqedonisë nga forma komuniste njëpartiake në formën e pluralizmit politik, Maqedonia është detyruar të nënshkruaj të gjitha konventat, të gjitha protokollet ndërkombëtare të respektimit të diversitetit etnik, gjuhësor, kulturor, fetar, etj. Fatkeqësisht nënshkrimi i këtyre konventave, i protokolleve ka qenë sa për sy e faqe dhe për përfitime materiale të Maqedonisë nga demokracitë perëndimore. Praktika ka dëshmuar se shteti i Maqedonisë ka vazhduar me të njëjtat praktika gjenocidale dhe etnocidale, sepse etnocidi nënkupton shkatërrimin e një kulture të një populli dhe kjo formë e dhunës e ushtruar ndaj shqiptarëve ishte gjenerator i luftës së 2001-shit. Lufta e 2001-shit ishte luftë e drejtë e cila u ndërpre me ndërmjetësim ndërkombëtar dhe fatmirësisht duke u mbështetur në këtë politikë aktive të vendeve të BE-së, lufta përfundoi shumë shpejt. Pasojat janë të mëdha dhe kanë mund të jenë edhe më të mëdha. Marrëveshja e Ohrit e cila i dha fund një lufte nuk arriti të ndërtojë paqen, sepse kjo marrëveshje nuk u realizua. Që nga ardhja e Nikolla Gruevskit në krye të VMRE-DPMNE-së, ai mobilizoi të gjitha qarqet antishqiptare në Maqedoni që të shkatërrojnë edhe këtë pak marrëveshje që hapte rrugën e zgjidhjes së të gjitha problemeve të shqiptarëve në Maqedoni përmes një dialogu permanent. Ai organizoi referendumin në vitin 2004, në të cilin dolën rreth 400 mijë njerëz në favor të asgjësimit të Marrëveshjes së Ohrit. Edhe pse marrëveshja nuk u shkatërrua përmes referendumit, ardhja e tij në pushtet në vitin 2006 dhe deri sot, dëshmon se praktikisht ka bërë çdo gjë që të shkatërrojë thelbin e kësaj marrëveshje, thelbin e zgjidhjes së dialogut politik. Ne si parti e kemi titulluar këtë marrëveshje si Platformë Antidiskriminim sepse vetëm duke u mbështetur në të gjitha konventat dhe protokollet ndërkombëtare dhe Marrëveshjen e Ohrit mund të gjendet instrumente të së drejtës ndërkombëtare që do të heqim të gjitha format e diskriminimit. Përmendi disa konventat që i kemi përfshi në platformë: Maqedonia ka nënshkruar konventën kundër diskrimiminit racial (nënkupton të gjitha llojet e diskriminimeve racore, fetare, gjuhësore, në gjini, në moshë) është e ndaluar me konventa ndërkombëtare. Shqiptarët në Maqedoni, qoftë në aspektin kulturor, ekonomik, social, janë të diskriminuar. Ne kemi një ambicie që të dalim nga ky diskriminim ekstrem dhe vetëm duke i imponuar Maqedonisë respektimin e këtyre normave ndërkombëtare ne si popull mund të shohim një perspektivë të re.
KOHA: A do të thotë kjo se Marrëveshja e Ohrit nuk i ka përmbushur kërkesat e shqiptarëve në Maqedoni, dhe a duhet që të ridefinohet statusi juridik i shqiptarëve në Maqedoni?
　
Mahmuti: Në qoftë se nisemi nga logjika se nuk është realizuar Marrëveshja e Ohrit dhe duhet ta hedhim poshtë, unë nuk jam dakord, sepse si konventat, si protokollet ndërkombëtare, si Marrëveshja e Ohrit, janë armë e fuqishme në duart e shqiptarëve dhe ti hedhim këto armë ne bëjmë punën e atyre që nuk na e duan të mirën. Ne jemi të vetëdijshëm se asnjë nga protokollet ndërkombëtare, asnjë nga konventat ndërkombëtare, as Marrëveshja e Ohrit nuk është realizuar, megjithatë ne kërkojmë një mbështetje nga të gjitha institucionet ndërkombëtare me relevancë që t'i imponojnë Maqedonisë respektimin e tërësishëm të këtyre konventave. MO, sidomos pika 1/4 e parimeve themelore, hap një mundësi të tejkalimit të të gjitha problemeve që i kemi, sepse ajo u sugjeron, një një farë mënyre shtrëngon autoritetet e Maqedonisë që të përmirësojnë vazhdimisht kushtetutën e tyre, që në fund ajo të jetë në përputhje me kriteret demokratike, që ti plotësojë të gjitha nevojat me standarde ndërkombëtare. Kushtetuta aktuale e Maqedonisë nuk i plotëson nevojat e shqiptarëve, prandaj ridefinimi i Maqedonisë si shtet binacional, riorganizimi i Maqedonisë në një sistem ku sovraniteti nga poshtë lartë do të gjejë një formë adekuate, që shqiptarët t`i realizojnë të gjitha të drejtat, është e argumentuar në mënyrën më të mirë të mundshme në platformën tonë antidiskriminim. Ne jemi kategorikisht kundër sistemit unitarist sepse ky sovranitet nga lartë-poshtë e ka shndërruar Maqedoninë në një sistem ku beneficionet ekonomike dhe financiare shkojnë në dobi të maqedonasve. Ne kemi nevojë që sovraniteti i popullit të bëhet nga poshtë-lartë dhe cila do të jetë forma, konfederatë, federatë, të ekonomive rajonale apo kantoneve, kjo duhet të jetë një rezultat i bisedimeve të vazhdueshme për t'i dhënë përgjigje adekuate nevojave tona, për të hequr njëherë e përgjithmonë gjeneratorin e krizave permanente, dhe gjenerator i krizave permanente është kushtetuta e shtetit unitar.
KOHA: Në prag të fushatës u përfol një kolicionim i mundshëm mes BDI-së dhe BDSH-së, megjithatë kjo nuk ndodhi. Si e konsideroni faktin që shqiptarët në këto zgjedhje shkojnë ndaras me 7 parti politike?
　
Mahmuti: Në televizionin "Koha", në një debat me drejtorin e këtij televizioni dhe drejtuesin e emisionit "Mejdani", unë bëra një apel publik të gjithë liderëve të partive politike që të shtrijmë dorën e pajtimit njëri-tjetrit dhe të dalim si front unik përballë kësaj politike që aplikohet kundër shqiptarëve. Fatkeqësisht shumica e partive politike dhe liderëve nuk shprehën gatishmëri që në këto momente të bëhemi bashkë. Vetëm BDK-ja e Xhezair Shaqirit shprehu gatishmëri dhe unë pranova që së bashku me BDK-në të garojmë me platformën Antidiskriminim në këto zgjedhje.
Janë 7 parti, që kërkojnë dhe garojnë, unë i dëgjoj me vëmendje se si u kërkojnë njerëzve mbështetje. Sidomos i dëgjoj me vëmendje ata të cilët disa herë radhazi me rotacion kanë qenë në pushtet dhe nuk i kanë mbajtur premtimet, por për disa lider të partive politike shqiptarët janë numra dhe popullin e shohin si vota për të hyrë në pushtet dhe për të realizuar qëllimet dhe interesat e tyre personale.
Pse dështuan koalicionet parazgjedhore, unë nuk mund të jap një sqarim sepse sinqerisht kam qenë i interesuar që të bashkohemi. Ata që nuk deshën të bashkohen, ata le të japin përgjigje. Një gjë është e qartë, bashkimi i forcave politike shqiptare është në indin e çdo shqiptari. Shumica absolute e popullit dëshiron të na shohë të bashkuar. Por në kuadër të partive politike ka grupe interesash të cilën shihen të rrezikuar nga bashkimi i forcës, dhe ata do të rrezikojnë të humbin privilegjet e tyre, dhe ata nuk do të mbeten në listat e deputetëve të atyre partive që konkurrojnë dhe kanë qenë kundër bashkimit të partive politike shqiptare. Sepse ata votën e kërkojnë vetëm për të shkuar në parlament dhe për të marr rrogë, dhe nuk kërkojnë votë për të mbrojtur interesat e popullit. Populli shqiptar është një popull mjaft intelegjent dhe e kam përcjellë se njerëzit të cilët kanë qenë në parlament nuk e kanë çelur gojën për disa mandate rresht. Populli thotë: Ta jap besimin dhe nëse këtë besim ma kthen me të keq, kur hallall nuk ta bëj. Populli shqiptar shpesh herë ua ka dhënë votën, qoftë në financa, për të mbajtur universitetin që e krijuan, qoftë për luftën çlirimtare, ky popull i ka ndenjur me mjete, dhe këtij populli t`i kthesh me të keqe, as në këtë dynja e as në dynjanë tjetër nuk do ta bëjnë hallall.
KOHA: Si e shihni particpimin e shqiptarëve në përbërjen e ardhshme qeveritare. Çfarë premisash duhet të përmbush koalicioni i ardhshëm shqiptaro-maqedonas?
　
Mahmuti: Në rend të parë ne e kemi normë statutare që koalicionet të jenë transparente për qytetarët. BDSH-në në këto bisedime nuk e përfaqëson vetëm kryetari që të bëjë marrëveshje kokë më kokë më dikë, ne përfaqësohemi me delegacion, dhe platforma jonë është platforma më e mirë që ndonjëherë e kanë pasur shqiptarët në Maqedoni. Është platformë që mbështetet mbi instrumentet e të drejtës ndërkombëtare që janë të favorshme për ne. Unë dëgjoj disa liderë partie që rrahin gjoks për platformën e tyre. E përcolla edhe liderin e PDSH-së kur tha se me këtë platformë do të hyjmë në zgjedhje. Nuk e di ai a e ka lexuar atë platformë që ia ka dhënë dikush. Do t`i kisha sugjeruar që ta lexoje mirë dhe kur ta lexoje mirë do të ketë probleme me atë njeri që ia ka dorëzuar, sepse platformë më antishqiptare ende nuk ka pasur në dorë opinioni publik shqiptar. Ajo është platformë që është ndërtuar me sugjerimet e VMRO-së dhe qarqeve antishqiptare. Është platformë anti-historike, me argumentet që sjell është platformë antishkencore dhe antishqiptare. Është platformë në frymën e referendumit që ka mbajtur VMRO-DPMNE në vitin 2004. Do t'i kisha sugjeruar që ta lexojë me vëmendje mirë dhe t'i marr në përgjegjësi ata njerëz që këtë platformë antishqiptare ia kanë servuar para që ta trandë para opinionit publik dhe popullin shqiptar. Me atë platformë nuk shkohet. Vetëm një platformë kanë shqiptarët që mbron interesat e tyre dhe le të ngrihen krejt shkencëtarët shqiptarë dhe nëse i gjejnë një presje gabim, atëherë ne do ta hedhim poshtë. Vetëm duke u mbështetur në principet e shkencës ne instrumentet e të drejtës ndërkombëtare, ne mund të dalim në rrugë të drejtë, ndryshe perspektivat janë të zymta. Ne nuk do të bëjmë pazarllëqe me interesat e popullit, të jeni të bindur se nëse marrim mandatin, nuk do të kufizohemi vetëm në Shkup për t`i realizuar të drejtat tona, ne do të ngremë padi në të gjitha gjykatat ndërkombëtare për të marrë dëmshpërblimin e një dhunë sistematike që 70 vjet e ushtron Shkupi kundër shqiptarëve. Ne dimë se ku duhet të trokitet dhe si duhet bërë, por për të realizuar këto na duhet mandati i popullit. Asnjë premisë tjetër ku nuk do të parashihet realizimi i kërkesave të shqiptarëve nuk do të krijojë qeveri legjitime. Çdo pazarllëk vetëm për të hyrë në qeveri, është antishqiptar.
　
Në mbrojtje të "Hoxhës" dhe "Lekës"
KOHA: Në listat e BDSH paraqiten ish-komandantë të UÇK-së, si Xhezair Shaqiri dhe Daut Rexhepi. Cili ka qenë qëllimi kur në lista keni përfshirë këto personalitete?
　
Mahmuti: Nga momenti unë kur bëra apel për bashkim të spektrit politik dhe shoqëror shqiptar, komandant Leka-Daut Rexhepi erdh i pari u rreshtua, Xhezair Shaqiri erdh i dyti, më pas profesoresha e nderuar Myqyreme Rusi, pastaj Dashamir Marku nga Dibra, një numër intelektualësh dhe veprimtarësh që u afruan rreth opsionit se vetëm bashkimi mund të na nxjerrë nga kjo situatë e vështirë. Komandant Hoxha është objekt i një procesi të montuar dhe ne në platformën tonë kemi nxjerrë sheshit se kemi për qëllim politik që të ngadhënjejë drejtësia. Maqedonia është shtet që ka nënshkruar konventën kundër përdorimit të dhunës dhe presioneve gjatë hetuesisë, por të gjitha organizatat joqeveritare ndërkombëtare, që janë të dëshmuara në luftën për të drejtat e njeriut, në shumë raste kanë nxjerrë foto rrëqethëse ku duket se shqiptarët torturohen barbarisht gjatë hetuesisë për t`i detyruar njerëzit për t'i pranuar veprat që nuk i kanë bërë. Në vitin 2010, të gjitha bartësit e funksioneve, duke filluar nga vetë kryetari i shtetit, kryeministri, liderët e partive politike maqedonase e shqiptare, e pranuan publikisht se në Maqedoni hetuesia është e ngarkuar me presione partiake dhe politike, ka dirigjime partiake, në këtë aspekt u iniciua reforma për gjyqësinë. Kjo reformë nuk ishte e sinqertë dhe Nikolla Gruevski morri iniciativë që të spastrojë hetuesinë dhe gjyqësinë nga ndikimet tjera politike dhe të ketë monopol mbi këto institucione. Të konstatohet se nëpër burgje mbahen njerëz të pafajshëm, kjo është kulmi i padrejtësive, dhe ne angazhohemi që njëherë e përgjithmonë të ngadhënjejë drejtësia duke u liruar të gjithë të pafajshmit që mbahen nëpër burgjet dhe duke i riparuar dëmet që u janë shkaktuar individëve. Duke e pasur një orientim programor në platformën tonë Antidiskrimin, ne e kemi pritur duarhapur ardhjen e komandant Hoxhës që është objekt i procesit të montuar dhe Daut Rexhepit dhe shokëve të tij që pritet të hapen procese të montuara. Ne nuk kemi lëshuar pe para asnjë shantazhi, para asnjë presioni për të hequr nga listat njerëzit që janë dëshmuar kombëtarisht. Se dikujt nuk i pëlqen, ne jemi të vetëdijshëm dhe se drejtësia është në anën tonë dhe kontribuojmë për çtensionimin e situatës. Duke qenë Hoxha në parlament, ne e zvogëlojmë rrezikun e një shfryrje institucionale ndaj shqiptarëve.
Comments (0)
Dërgoja shokut
Printo
