VOAL - Online Zëri i Shqiptarëve - STRASBURGU I JEP TË DREJTË SHQIPTARES DHE FAJËSON ZVICRËN

Gjykata Evropiane për të Drejtat e Njeriut Në Strasburg ka shpallur fajtore Zvicrën se ka shkelur të drejtat e njeriut në një rast të rrëmbimit të një fëmije.

E dëmtuar në këtë rast ka qenë një grua 44 vjeçe nga Kosova, e cila në Strasburg është ankuar se Zvicra nuk i ka garantuar asaj procedurë korrekte.

Gruaja në fjalë sot jeton në Maqedoni dhe është nënë e dy djemve, 19 gjegjësisht 12 vjeç. Fillimisht ajo jetonte me babanë e fëmijëve të saj në Maqedoni. Pastaj, ne vitin 2005 ajo u martua me një italian që jetonte në Zvicër te i cili u shpërngul një vit më vonë bashkë me fëmijët e saj. Pas kësaj, babai kërkonte t`ia kthenin fëmijët në Maqedoni, gjë që e kishte kërkuar edhe shteti maqedonas përmes një kërkese të bazuar në Marrëveshjen ndërkombëtare të Hagës mbi rrëmbimin e fëmijëve.

Shkalla e dytë e gjykimit, në Zvicër i kishte dhënë të drejtë babait dhe kishte vendosur kthimin e fëmijëve në Maqedoni. Gjykata ticineze e Apelit e cila e kishte shqyrtuar rastin, kishte bërë një gabim në dhënien e të drejtës për apelim, duke informuar nënën e fëmijëve se ajo brenda 30 ditëve kishte të drejtë të ankohej në Gjykatën Federale, ndërkohë që ky afat realisht është vetëm dhjetë ditë.

Për këtë arsye, ankesa në Gjykatën Federale kishte shkuar me vonesë, kështu që ajo e kishte hedhur poshtë atë si të papranueshme. Kjo kishte bërë që fëmijët e kosovares të ktheheshin në Maqedoni në vitin 2007. Më vonë edhe ajo shkurorëzohet nga bashkëshorti dhe kthehet në Maqedoni ku jeton së bashku me fëmijët dhe ka kontakt të shpeshtë me babain e fëmijëve.

Gjykata Evropiane për të Drejtat e Njeriut në Strasburg ka shprehur qëndrimin e saj se Zvicra ka penguar qasjen e kosovares në gjykatat e vendit, shkruan nzz.ch. Gjykata Federale, duke detyruar kosovaren të bartë pasojat e gabimit të Gjykatës së Tiçinos lidhur me afatin e ankesës, ka vepruar tepër ashpër. Për një rast sikur ky, në të cilin bëhet fjalë për rrëmbimin e fëmijëve, një veprim i tillë i gjykatës është disproporcional. Si dëmshpërblim, Zvicra duhet t`i paguajë gruas në fjalë 5000 euro dhe 4000 euro të tjera për shpenzimet e bëra. /Albinfo