VOAL - Online Zëri i Shqiptarëve - GJAKOVË - POETËT EKSPOZUAN DHJETËRA FOTOGRAFI NGA MASAKRAT E LUFTËS SË VITEVE 1998-1999

GJAKOVË - Prej dy vjetësh,tashmë në shumë vende të botës, mbahet manifestimi kulturor ndërkombëtar "100 mijë poetë për ndryshim", manifestim që sivjet u organizua edhe në komuna e Gjakovës. Me manifestimin e mbajtur , poetët gjakovarë, por jo vetëm ata, u shprehën se janë për ndryshime në të gjitha fushat e jetës. Disa dhjetëra fotografi nga masakra të ndryshme që kanë ndodhur në komunën e Gjakovës në vitet e luftës së fundit (1998 e 1999), të ekspozuara në qendër të qytetit, e shënuan nismën e këtij manifestimi, i cili zgjati 3 ditë. Organizatore ishte Qendra Kombëtare e Poetëve, Artistëve dhe Shkrimtarëve (QKPASH) "Gjakova".

Ky manifestim kishte për qëllim të zgjojë vetëdijen e banorëve të Gjakovës, që përmes këtyre fotografive t'i nxisim ata për ndryshime pozitive në të gjitha fushat e jetës. Sot kemi familjarë të dëshmorëve, të martirëve e të zhdukurve, veteranë e invalidë të luftës, që nuk e kanë asnjë cent për të jetuar. Kemi njerëz që po luftojnë për mbijetesë. Prandaj është moment i fundit që ne ta ngremë zërin dhe të vendosim për ndryshime. Në hapje të këtij manifestimi kemi vendosur t'i paraqesim këto foto nga krimet serbe, të cilat fatkeqësisht kanë filluar të harrohen nga qeveritë tona, pavarësisht nga cilat parti vijnë", ka thënë Mevlyde Saraçi, kryetare e QKPASH "Gjakova", duke shtuar se në këtë manifestim ndërkombëtar, deri më tash janë të inkuadruara një numër i madh i shteteve nga mbarë bota.

"Aty ku ka luftëra bëhet thirrje për paqe dhe liri, aty ku shkelen të drejtat e njeriut mbahen protesta, ndërkaq ne që e arritëm lirinë me gjakun e të rënëve tanë, kemi vendosur që përmes këtyre fotografive t'i tregojmë opinionit vendor e ndërkombëtar se jemi paqësorë, por që ne nuk e harrojmë të kaluarën. Ne nuk hakmerremi, por as nuk falim", është shprehur më tej Saraçi.

Ky manifestim që për herë të parë po mbahet në Kosovë, ka vazhduar me disa aktivitete të larmishme,si orën letrare dhe me tryezën "Poetët e kombit apelojnë", ndërsa në ditën e tretë është shfaqur filmi dokumentar "Lotët e Lirisë", që i kushtohet të gjitha familjeve që më të dashurit e tyre i kanë pasur dhe vazhdojnë t'i kenë të zhdukur.