Lotët m'u thinjën...
Një fund gushti, mbrëmje vonë
Dritat shkëlqenin si re shpërthimesh.
Në natën e zezë një dhimbje m'përshkoi
Tej për tej mushkëritë...
Puthja mizore më ngriu në buzë
Ëndrra m'u venit, ndjeva poshtërim.
Ishte mbrëmje e ftohtë gushti
Që m'i dogji të gjitha fjalët
Iluzionet robëroheshin pa kufi...
Pashë hijen e duarve fantazma
Që përkëdhelnin trupin e tij...
Dëgjova xhelozinë nga fundi i humnerës
Të më pështyjë...
Nata më sillej rrotull si xhind,
Dashuria m'u vodh, lotët m'u thinjën...
Një fund gushti, mbrëmje vonë
Pas dritares më fanitej hija e një lisi...
Korniza
Fjala rënkon nën mure muzgjesh
Portreti rri varur në kornizë të ditarit
Si gjethet e limonit në një degë të thyer...
Sekondat, orët, ditët janë mbyllur
Në kështjellë të harrimit...
Të dëshiruara presin një buzëqeshje...
Shpirti përpëlitet para pasqyrës së hënës
Rënkon humbjen e dritës së virgjër...
Errësira shqelmon si lëneshë
Duart që përkëdhelin kornizën
Dashuria përgjon kthetrat e hijedritës
Skeleti i Kornizës shqyen portat e mërisë...
Dritë mbi errësirë...
Teksa shoh hijen tënde
Të përpëlitet buzë dhimbjes a krenarisë
Përqafoj orët e dritëzuara që më varen
Si relike muzgjeve truplëshuar...
Atëherë dashurova sekondat e frymëmarrjes tënde
Për të cilat jam nostalgjike deri në amshim.
Tani në fustanin tim të bardhë
Kam qëndisur ngjyrat e zeza,
Si të pantallonave të tua
Që shpesh t'i kam larë e hekurosur
Për t'i ngritur në altarin e ndjenjës më njerëzore,
Mbrëmjeve të rreckosura e të trishtuara
Ku flakëronin sytë e ty e çirrej përkëdhelja...
Dhe buzët pëshpërisnin fjalë të mekura...
Teksa ndjej vështrimin e hijes sate
Vallëzoj me dhimbjen e krenarisë,
Në sfondin e ngjyrave shfaqet e kuqja...
Nëse kërkon fjollëza të arta në tekat e tua
Aty është muri ndarës me zemëratë gruaje
I ngjyer me fjalë zemre e gurë mirësie
E gërryen tenja e vesës së tradhtisë..
Atëherë dashurova aventurat e tua,
Siç dashuroj tani shpirtin tënd në harrim...
Në çdo të fshehtë të kujtimeve
Shoh dritë mbi errësirë...
Kërkon shpirt gruaje
Tejpërtej murit të dhimbjes
Nuk shoh dritë, dëgjoj veç zëra
Të kryqëzuar nga ligësia
Presin lotët e një gruaje...
Tejpërtej ngrehinës së mërisë
Përpëlitet një dritë e vobektë
Mbledhur si lëmsh
Kërkon duart e një gruaje...
Tejpërtej humnerës së urrejtjes
Pipëtin një dritë hijezhveshur
Ligështuar deri në amshim
Kërkon një shpirt gruaje...
Baladë nënës sime
Era e tërbuar e shekujve
U përplas ndër gjokse engjujsh të pafaj
koha u trullos dhe u bë qameti
nëna ime ballërrudhur e shpirtplasur,
këndon:
"Janinës ç'i panë sitëeee, Jaaaninoooo
Ish e prëmte ajo ditëeee, Jaaaaajaninooo"
Oh, nënë, ç'është ky zë si në legjendë
Që drithëron dhe eshtrat e të parëve në çdo qelizë
Ah moj bije e nënës, e njoh mirë këtë gjëmë
ish shtrëngatë e stuhi, në atë kohë
yjet ranë nga qielli të përgjakur, një e nga një
Kafka e hënës ra në prehrin e tokës amë
barërat u helmuan, livadhet u gjakosën anë e kënd...
Mos nënë, mos më thuaj gjak, gjak...ohhhhhhhh
Po bijë, sa gjak është derdhur në tokën Arbënore
Toka e përgjakur nga kufomat më rrinë ende në sy...
Shkëmbinjtë shekullore u copëtuan nga dhimbja
ia ndërruan format, ngjyrat, emërtimet...
Eh, s'munda të ngjyej as hijen e gishtit,
të shkruaj emrin mbi një varr,
në oxhakun ku kam qarë për herë të parë...
O Zot, sa shumë dhimbje e lot ka pirë kjo tokë
dielli po më rrezohet para këmbëve të mia
Në qerpikë më ka ngrirë kripa e lotit...
Ku rënkon e thinjur në vetull, Çamëria...
Janinës ç'i panë sitëeeee, Jaaaa janinoooooooo...
Të lutem nënë, mos këndo më, se më lëndon
Po moj bijë, do këndoj, sa të plas, se kështu është historia!
Ndër buzë qëndis poezinë
Jam gur i vdekur, rri strukur
Nën ahet e zhveshura shekullore
Ku dielli lind e perëndon me dritë të vakët
Dhe vesa pikon gjak mbi gjethet e shkruara
Ndër sirtarët e sharruar nga druvarët shenjtorë...
E tinguj mortor rrëshqasin fletëve të zverdhura....
Jam gur varri, kam ecur hijeve dritë-verdha
Në trupin tim kam veshur xhubleta me ojna dielli
Të ndjell zgjoje bletësh në kohë stuhish...
Ëndërrimtarët i zu trishtimi në qoshe të konakut,
nga përgjumja dimërore, koha i kryqëzoi dashuritë...
Jam gur varri, fle dhe zgjohem në copëza shkretëtirash
me gishtat e zgjimit mbështjell fytyrën
për të lindur foshnjën në djep baladash
që të këndojë këngën e përjetshme, në krahë të lirisë...
"O sa mirë me ken shqiptar, o hej, o hej, o heeeej"
Jam gur i vdekur, fryma m'lëshon zaaaaaaaaaaaaaa
N'jele të historisë...
IDENTITETIN ma lidhën me zinxhirë n'gijotinë,
Legjenda u përlot dhe veshi kostumin më të bukur
me plagët e marra në telat e lahutës
Që shëtisnin honeve në vendet e qytetëruara.
Të gjitha sprovat i kanë bërë në trupin tim,
Por unë marr frymë me mushkri të reja dashurie,
edhe pse ajri ashtë copëtua mes trëndafilash të plagosur,
Në dheun e ashpër dhe të dashur fisnikërisht,
Tingujt lëshonin dhe përthithnin hire drite...
Dje në "Shekullin më të ri" prometeu Migjen klithte:
"O, si nuk kam një grusht të fortë
t'i bi m'u në zemër malit që s'bëzan
ta dij edhe ai se çdo me thanë i dobët,
n'agoni të përdridhet si vigan i vramë!"
Sot jetojmë me kohën, në botën moderne
Edhe pse mbi krye më valëviten dy flamuj, në një trung...
Unë gjunjëzohem deri në amshim
Para flamurit tim ku më buzëqesh flokëbardhi, Ismail Qemali.
E prapë jam gur i vdekur... që shoh, dëgjoj, ulërij e brohoras:
"O sa mirë me ken shqiptar, o hej, o hej, o heeeej"
E tash, në shekullin e XXI
Buzëqeshim austradave të botës, me emrin emigrant
Jetojmë në kohë moderne, ajrin e arnojmë me fijet e diellit
Të mos zbulojë botën e hipokrizisë,
bukurinë e gënjeshtër, mosmirënjohjen, marrëzitë...
Mbi kokën time dëgjoj hënën që lëngon
Duke parë shtojzovallet trotuareve të Evropës...
Yjet kryqëzohen ngricave të traditës dhe moralit të pështirë
Që m'janë lidh për fyt si kocka të helmuara...
Dhe krekosen kurriz-shtrirë,
se paraja është më e rëndësishme se identiteti dhe liria!
Jam gur i vdekur, frymoj në botën moderne
Ndër buzë qëndis poezinë....
--
Fatime Kulli lindur me 23 korrik 1957 ne Durrës. Pas shkollës fillore dhe 8 vjeçare, ka mbaruar Shkollën e Mjeshtërisë sportive në Durrës. Shkollën e Mesme të Përgjithshme dhe të Mesmen Teknologjike në qytetin e Shkodrës. Per arsye politike te familjes se saj, ka vuajtur debim-interrnim per shume vjet dhe pas vitit 1990, ka mbaruar studimet e larta në fakultetin filologjik, shkencat sociale. Pas viteve, 91 punon si gazetare në shtypin e qytetit të Veriut, Radio Shkodra, gazeta "Shqipëria Etnike", Drejtore në televizionin 2ATV, në Radio-Tirana, si dhe në disa gazeta periodike dhe kulturore.
Kryeredaktore në Gazetën "Ndryshe" dhe Drejtore në revistën "Obelisk".
Botime:
-"Ma lini portën çelë" (poezi)
-"Lakuriq mbi tastierë" (poezi)
-"Masturboj me diellin" (poezi)
- "Parlament në pyll" (fabula)
- "Zemrën e dua pasqyrë" (poezi)
- "Tensione emocionesh" (tregime)
- "Ethet e zhveshura" (poezi italisht-shqip)
- "Shkëndija e eshkës" (poezi- botuar në Shkup)
- "Deti mbytet në guaskë" (poezi- botuar në Kumanovë)
- "Trëndafil i djersitur" (poezi-botuar në Tetovë)
- "Në gojë të diellit" (poezi për fëmijë)
- "Drithërimat e frikës" (roman)
- "Cila është më bukur" (poemë për fëmijë)
- "Uragani i meteorëve" (monografi-studim-publicistikë)
- "111 fjalë të ndyra dashurie" (poezi & tregime)
- "Mitra e zjarrit" (poezi)
- "Njëzet e dy" (roman)
-Këpucët e Mjegullës (poezi)
Ka marrë këto vlerësime nÄ— aktivitete letrare:
- Në vitin 2001 ka marrë Çmimin "Radio Ulqini" në Mal të Zi (me poezinë "Kam frikë", të librit "Ethet e zhveshura"
- Në vitin 2002 është vlerësuar me vendin e dytë në takimin poetik të Salernos në - --- Napolit, midis 100 poetëve nga Evropa.
- Është vlerësuar si poetja më e mirë e poezisë lirike erotike në takimin Ballkanik që është zhvilluar në KorcÄ— në vitin 2002.
- Ka marrë Penën e Artë në Kumanovë me librin "Deti mbytet në guaskë" në vitin 2003.
- Pjesëmarrëse në Institutin e Shkencave të Letërsisë në Kembrixh, me librin poetik "Trëndafil i djersitur" në vitin 2004.
- Ka marrë Penën e Artë në Athinë (në klubin e shkrimtarëve "Kodmus") me ese të përzgjedhur nga libri studimor "Retinë" në vitin 5005.
- Pjesëmarrëse në takimin e kritikëve Evropianë në Gjenova, ku është vlerësuar si një intelektual "ndryshe" në fushën e kritikës letrare, në vitin 2006.
- Fituese e çmimit të Parë në takimin e Poeteshave Shqiptare në Vushtri, maj 2008.
- Fituese e çmimit "Skampini" ne takimin Ballkanik ne Elbasan 2009.
- Pjesëmarrëse në festivalin e poezinë botërore në Strugë, gusht 2009.
Comments (0)
Dërgoja shokut
Printo
