ODIHR SJELL MISION VLERËSIMI PËR ZGJEDHJET E 23 QERSHORIT OSBE sqaroi se zyra e saj ODIHR është ftuar nga Shqipëria qysh në dhjetorin e kaluar
E Martë, 03.12.2013, 07:45am (GMT+1)
Organizata për Siguri dhe Bashkëpunim në Europë (OSCE) dhe Zyra e saj për
Institucione Demokratike dhe të Drejta Njerëzore (ODIHR) kanë sjellë në
Shqipëri një mision vlerësimi lidhur me vëzhguesit që nevojiten në zgjedhjet e
qershorit. Misioni i ODIHR-it po qëndron për katër ditë në Tiranë për të marrë
masa për një vëzhgim të plotë të procesit, ndërkohë që partitë po shkallëzojnë
fushatën e tyre të hershme zgjedhore. Ndërsa Komisioni Qendror i Zgjedhore i
bëri thirrje opozitës që të bashkëpunojë për ngritjen e komisioneve zonale.
Partia Socialiste e opozitës shkëmbeu replika në mbrëmje me KQZ për detaje të
përgatitjeve zgjedhore që lidhen me ngritjen e komisioneve zonale. Më parë
ishte KQZ që njoftoi se PS nuk ka dërguar propozimet e veta për antarë dhe sekretarë
të komisioneve zonale tashmë që afati ligjor, sipas saj, ka skaduar të premten,
dhe kur PD, LSI dhe PDNJ i kanë dorëzuar në rregull ato. KQZ theksoi se këto
komisione zonale duhet të ngrihen brenda datës 23 mars dhe për këtë qëllim
sipas Kodit Zgjedhor katër partitë duhet t'i kishin paraqitur ato deri në 8
mars. Duke theksuar se kjo vonesë nga PS në paraqitjen e komisionerëve, KQZ i
bëri thirrje opozitës që të paraqesë sa më shpejt të jetë e mundur këto
propozime në përputhje me Kodi Zgjedhor.
Por PS deklaroi se i ka dorëzuar të hënën në mesditë brenda afatit ligjor,
listat me propozimet e saj për komisionerë zonalë, sepse afati ligjor sipas
tyre, është 11 marsi dhe jo 8 marsi, siç tha KQZ. PS theksoi se sipas Kodit
Zgjedhor këto propozime duhen dorëzuar 105 ditë para datës së zgjedhjeve, që i
binte e dielë 10 mars, ndaj afati me ligj shtyhet një ditë më pas. PS deklaroi
se qëndrimi i KQZ ishte tërësisht politik dhe keqinformues. Opozita tha se KQZ
fsheh të vërtetat me deklarata të tilla të cilat nuk i shërbejnë klimës së
besimit, që ky institucion duhet të krijojë, por madje hedhin hije të forta
dyshimi se KQZ kërkon të minojë besimin e publikut tek ky institucion.
Kështu, kur kanë mbetur rreth 100 ditë nga zgjedhjet e përgjithshme
parlamentare tonet politike po shtohen, fushata po përshkallëzohet më tej,
ndërkohë që një mision i vëzhguesve po viziton Tiranën për të parë nga afër
përgatitjet. Një ekip vlerësues i Zyrës për Institucione Demokratike dhe të
Drejta Njerëzore është sot në ditën e dytë të një vizite katër ditore në Tiranë
për të vlerësuar nevojat e vëzhgimit të zgjedhjeve në Shqipëri. Ky mision po
takohet me ekspertët e OSBE-së, të KQZ-së dhe partive politike dhe në
fund do të hartojë një raport për të vlerësuar se cilat janë nevojat për
vëzhgues, dhe për numrin e tyre.
OSBE sqaroi se zyra e saj ODIHR është ftuar nga Shqipëria qysh në dhjetorin e
kaluar, sapo presidenti dekretoi zgjedhjet, që të dërgojë një mision vëzhgimi
në zgjedhjet parlamentare të 23 qershorit. Institucionet shqiptare dhe partitë
kryesore po u kërkojnë shteteve dhe organizatave të shumta nga Europa dhe SHBA
që të sjellin një numër sa më të madh vëzhguesish në këto zgjedhje, si e vetmja
mënyrë që të mbushet hendeku i mad hi mosbesimit të forcave rivale tek procesi
zgjedhor, edhe pse ato e hartuan dhe e zbatojnë vetë Kodin Zgjedhor me
komisione dypalëshe.
www.voal-online.ch
|