Qeveria greke po negocion në Athinë me partnerët europianë për kredi të
tjera ndihme për vendin e tronditur nga kriza. Athina synon tani
zgjatjen e afatit të kthimit të kredive nga 30 në 50 vjet. Krahas kësaj
grekët kërkojnë edhe uljen e normave të interesit. Në nëntor 2012
Eurogrupi i dha shpresa Athinës, se do të vazhdonte mbështetjen me
kredi, por me kusht që masat e kursimit të jepnin efekt, pra Athina të
dilte me një plus buxhetor - kur prurjet e saj buxhetore pas heqjes së
shpenzimeve të mbeteshin ende në plus - pa llogaritur këstet e kthimit
të kredive. Komisioni Europian bëri të ditur javën e kaluar se Athina e
ka arritur këtë objektiv. Por nëse Athina vërtet më shumë fut se nxjerr
nga arka e buxhetit, kjo është një temë mjaft e kontestuar mes
ekonomistëve.
Para një jave, KE i atestoi Greqisë një plus buxhetor prej 1,5 miliardë
eurosh për vitin e shkuar. Shumë ekonomistë këtë e quajnë një
vetëmashtrim që bëjnë si BE, FMN po ashtu edhe Athina. Sipas Hans Werner
Sinn, drejtor i Institutit të Mynihut Ifo, një plus buxhetor del shumë
shpejt po qe se lihen mënjanë disa shpenzime.
Nuk ka plus buxhetor
A do të hapen dyqanet sërish?
"Greqia nuk ka mbërritur aspak tek një plus buxhetor, ky është një
informacion që fryhet nga shtypi dhe është i gabuar", thotë Sinn, për
Deutsche Wellen. "Greqia ka një deficit të theksuar primar. FMN nuk e
llogarit një pjesë të deficitit për ndihmat e tij. Por ky është veçse
një përcaktim që bën FMN dhe jo eurostati apo zyra ta tjera
statistikore", shpjegon Sinn.
Në të vërtetë Eurostati me qendër në Luksemburg nuk ka llogaritur asnjë
shifër pozitive. Tek këto shifra mbërrin KE dhe FMN, pasi ato lenë pa
llogaritur disa shpenzimet të veçanta "të dhëna vetëm një herë" - si për
shembull 20 miliardë eurot, që iu janë dhënë Athinës për të rimëkëmbur
bankat greke në krizë.
Athina para një "Comeback"-u të ri?
Komisioni Europian është shumë i përkushtuar të përcjellë një imazh
pozitiv të Greqisë. Sipas KE vendi i prekur më së shumti nga kriza
ndodhet para një "comeback-u". Prodhimi i përgjithshëm bruto do të duhet
që në vitin 2014 të rritet, për herë të parë pas gjashtë vitesh me 0,6
%, sipas optimistëve në Bruksel. Në një prognozë koniunkturore të
publikuar nga Komisioni Europian të hënën (05.05), thuhet se edhe
qetësimi i eurozonës do të mund të ndikojë në gjallërimin e eksporteve".
Sipas pritshmërive në vitin 2015 madje prodhimi i përgjithshëm bruto në
Greqi do të duhet të kapë 2,9 %. Në prognozën e BE-së theksohet më tej
se "do të rriten si investimet e huaja ashtu edhe konsumi privat".
Papunësia madje do të reduktohet nga 27,3% në vitin e kaluar në 24% në
vitin e ardhshëm. Por borxhet mbeten ende të larta: Vërtet që rifutja në
borxh nuk do të jetë më shumë e lartë - nga 12,7% në 2013-n ajo do të
bjerë në 1,0% në vitin 2015, por mali me borxhe i Greqisë ende do të
përbëjë 172,4% të kapacitetit ekonomik të këtij vendi. Ndërkohë që
marrëveshjet e BE-së parashohin një kufi maksimal të borxhit publik deri
në 60%.dw
Comments (0)
Dërgoja shokut
Printo
