Gazeta prestigjoze amerikane "Huffington Post", në një artikull të saj i
kushtoi vëmendje 14 objekteve kulturore dhe historike në rrezik zhdukjeje në
Europë. Në listën e cituar nga kjo gazetë është edhe Amfiteatri i Durrësit.
Muajin e kaluar, shkruan Huffington Post, organizata e ruajtjes së trashëgimisë
kulturore dhe historike "Europa Nostra", rënditi një listë me 14 objekte të
trashëgimisë kulturore në rrezik në gjithë Europën. Mes këtyre objekteve janë
kisha, zona arkeologjikë dhe vendbanime të hershme.
"Huffington Post" shkruan se ky amfiteatër me vlera të rralla arkeologjike
dhe kulturore, rrezikohet seriozisht nga ndërtimet urbane në Durrës, që kanë
prekur një pjesë të tij si dhe nga mungesa e vëmendjes.
Më 16 qershor, shtatë nga 14 objektet më të rrezikuara në Europë do të
përzgjidhen për t'u bërë pjesë e një plani shpëtimi që do t'i paraqitet
Organizmit të Ruajtjes së Trashëgimisë Europiane gjatë konferencës që do mbahet
në muajin dhjetor në Bruksel.
Amfiteatri i Durrësit, i zbuluar në vitin 1966 është më i madhi dhe më i
rëndësishmi jo vetëm në Shqipëri, por edhe në Ballkan. Ai është ndërtuar në
fillim të shekullit të parë të erës sonë, gjatë sundimit të perandorit romak,
Trajan.
Amfiteatri ka formë elipsi me
diametër 136 metra dhe lartësi 20 metra. Ka qenë qendër e rëndësishme e
organizimit të lojërave olimpike romake dhe kapaciteti i tij përllogaritej diku
nga 15 deri në 20 mijë shikues.