NATË PËRVËLUESE NË LAS VEGAS
Natë përvëluese në Las Vegas
Duke ecur në bar
shkel një homelës në gjumë
si dinosauer
Bërtet ai bërtas unë
Nga njëri-tjetri pse frikë
Kthej kokën: A më ndjek
Aligator mos ish
Befas currila uji
më sulmojnë nga çdo anë
që nga Bellaxhio larg
Ç'mëkate kam për të larë
Kazinot si meduza
pas xhaketës më kapin
Me sytë-zjarr më ngrijnë
më zbrazin kredit-kartat
Te udhëkryqi Strip-Sahare
Një Lopë e Shenjtë përballë
Ç'u bëra flì padashur
majë brirësh të saj
Koka enjtur më dhemb
Fraktura plot kam marr
Dje gdhiva milioner
Homelës sot ngrysur jam
Në strip vend i shenjtë i
lodhur më vinte gjumë
Mbi jastëkë të butë gjinjsh
ëndërr zhgjëndërr një grimë
II
Halucinacion pështjellues:
Përçartur më vjen kënga
"Fryni era u çil taraba
në saraj vjen Halil Aga
me treqind sejmenë përmbrapa
tanë në openga pa çorapa
Tanë në çorapa pa openg
ku i kem armët ku i kem lanë
Na i ka mshef veziri mbramë
s'e ka në mend me na i dhanë
Më paç në qafë mori motër
që na thirre në (Vegas) Shkodër"
*
Në sarajet vegane
pa openga pa çorapa
Ç'deshe o Musë
Musa i vogël
VDEKJA E TEATRIT
Pronari i dikurshëm i trollit
mbërtheu dyert e ndërtesës me gozhdë të mëdha
nga ato që kryqëzuan Krishtin mbi tra
Aktorët emigruan në vende të huaja
Atje punojnë si pastrues pjatalarës hamenj
fshijnë xhame makinash në udhëkryqe
Presin të zgjidhet konflikti me pronarin
në favor të tyre pritje absurde
Ja kështu u improvizua një ditë
në mënyrë amatore
premiera e sezonit të ri teatral
SCHERZO 9
Fetusi në barkun e nënës 9 muajsh
Spermatozoidi ovulat - shumëzimi i racës njerëzore
në mikroskop
Krimbi nën brirët e deshërve
që i shtyn të përplasen
gjer në kokëthyerje;
Gjarpri kotulluar poshtë gurit tek fle
ti ulur mbi gur;
Duke vërshëllyer një melodi
Liliputi me sombrero të madhe
akrobati mbi trarin e ekuilibrit;
Njeriu mbështjellë me pallto të trashë të zezë
mbi akull rrëshqitës
ose trupi i të varurit;
Krraba e çobanit yll i largët me bisht
filozofia e rrathëve spirale
aty koduar çkoduar;
MASTERKI I PARAJSËS FERRIT
Ose asgjë tjetër thjesht numri 9
me të vetmen poezi të simbolit
vijë e sprëdredhur si larvë
* * *
Tre 9 mbi kurriz avioni i Lufthansas
ditën kur erdha në Amerikë
9 orë rrugë e mërzitshme
kur zbrita në NY
nga mori nëntash pengmarrëse
mbi vitrina marketesh supermarketesh marifet i çmimeve
u gjenda rrethuar
99 cent bleva një jastëk të butë si prej puplash
thashë rehatova më në fund kokën shkëmb eurojuglindore
gjithë xhunga prej nënkresash të gurta ideologjish dogmash;
Thashë erdhi radha të fle dhe njëherë si qengj pa andralla;
si Ditën e Shën Gjergjit kur te jastëku gjeja lule gjethe shelgu
të njoma
nga dora e nënës
Por shpejt u shfry, kishte qenë surrogato
si fantomë m'u lidh rreth qafës, më zu frymën desh më mbyti
në mesnatë pahijshëm e flaka prej dritares
Mbi kokë i ra dikujt që kalonte
dëgjova një sharje kalibër i rëndë AK-47
* * *
Si nyja gordiane plot rastësi nëntash
lidhen krucialisht me jetën time
lëmsh i ngatërruar i Arianës
Një 9 te viti i lindjes 1947: dy Blloqet e mëdha Luftë e Ftohtë
një 9 tek adresa e vjetër në Durrës
një 9 rruga ku banoj këtu në Nju Jork
një 9 shëtitorja tek udhëkryqi ku semaforët e kuq
fërgëllojnë si ethe agonike
Një 9 porta e shtëpisë numri i telefonit
dhe një te targë e makinës
Tre numra të koduar që s'duhet t'i dijë njeri
përveç meje 9 sekret lumturie ose ankthi
Dhe plot 9 mbi dyer zyrash në labirinthe ndërtesash
9 torturuese paragrafesh ligjesh nenesh kodesh
* * *
Nga eskortë 9-tash rrethuar si prej badigardësh
ja dhe nata e fundit e vitit 1999 Natë nëntash
Natë ndërrimi mileniumesh
Natë e madhe e jashtëzakonshme
tre 9-ta tronditëse (1999)
letër bixhozi në duar perëndish të fateve;
Sonata e Hënës e Alfred de Myse
lexuar në përkthim shqip kur isha 9 vjeç;
Dhe një kujtesë zbavitëse: Nostradamusi
parathënës apokalipsesh
Pas disa sekondash regjistri do t'i fshijë tri 9-tat
tri Zero do të shfaqen në vend të tyre me një 2 superb përpara
si një kolonë mermeri në sfond të oqeanit të përjetësisë
zbukuruar me kapitel përsipër një kokë Davidi e Mikelanxhelos
Këtë çast duart tona si 9-ta mbajnë kupat 9-ta
mbushur brus me shaka për 9-ta shampanjë
e vjetër dymijë vjeçare shije e pakrahasueshme
ruajtur në qilare në kade shekujsh si vozë lisi
I tokim me kujdes të veçantë mos derdhen
nuk flasim dot dhe po të duam
Çast madhor pantomime
Moment solemn celebrimi
Shekullorë ndjehemi
Emocione baritje shekujsh tek ndërrohen
duke shkelur mbi 9-ta si mbi vezë
a si mbi bomba atomike
* * *
Kemi vallëzuar kënduar qeshur
thirrur vërshëllyer
zilja e telefonit s'ka pushuar
Nga dritarja fishekzjarre hodhëm
kemi bërë shumë zhurmë e kemi tepruar
Cigani Draksih pronar i shtëpisë
me violinën e vjetër troket në derë
jo një dy e tre
por 9 herë
Gotat tokim:
Rrofshin qeramarrësit
Pronarët rrofshin
Pas ca akordesh violine para se të largohet
na kujton qeranë:
9 janar të holla në dorë 900 dollarë
Kështu gëzuar trishtuar
mbaron kjo shaka me 9
(Nju Jork, 31 dhjetor 1999)
Tufë çelësash
Çelësi i apartamentit çelësi i garazhit çelësi i makinës
çelësi i garderrobës në punë dita-ditës tufa u rëndua
si e gardianit pastruesit të pallatit
Humb kohë të gjej njërin e tjetrin
ja ky s'di pse ndodhet këtu
Vonë jam kujtuar: çelësi i apartamentit në Durrës
shitur para disa vitesh kur erdha në Nju Jork
çelës fantazmë çelës yjesh
çelës kujtimesh që s'hidhen tej dhe po të duash
VIZITA E PARË TE STATUJA E LIRISË
Planet ujor
Dhe Ti mbretëreshë e tokëujrave
Me anije afrohemi ngadalë
Lundrim emocionues mbi East River
I gjatë i gjatë pafund
Dhe kaq i shkurtër njëzet minuta
Mbi kuvertë kaq shumë vizitorë
Të ngjashëm të ndryshëm gjenetikë lirie
Çdo ciceron i tepërt Diku dikur jemi takuar
Në mos qe veç një ëndërr
Kujtesë e largët fragment poezie censuruar
Para dekadash për ty shkruar
E shoh je kaq e zënë Statujë por të lutem please
Më fal enkas mua pak çaste poetike
28 Prill 2009