Përfaqësues të partive opozitare në Kosovë kanë drejtuar kritika të ashpra kundrejt qeverisë së vendit në lidhje me ngjarjet e fundit që kanë ndodhur në Kosovë.
Në deklararime të ndara, përfaqësues të tre prej partive më të mëdha opozitare, "Aleanca për Ardhmërinë e Kosovës", "Lidhja Demokratike e Dardanisë" dhe "ORA", kanë dënuar mënyrën e deritanishme të qeverisjes së vendit.
Reagimi i vonuar i qeverisë mbi nënshkrimin e protokollit EULEX Serbi ka qenë një nga kritikat e adresuara për qeverinë nga përfaqësues të partisë në opozitë Lidhja Demokratike e Dardanisë.
Ata kanë thënë se asnjë veprim i EULEX-it, apo faktori tjetër nuk do të pranohet nëse cënon integritetin e vendit dhe janë shprehur kundër nisjes së cfarëdo nisme për diskutime përmes një fizionomie të re për pjesën veriore të Mitrovicës.
Lideri i AAK-së Ramush Haradinaj gjithashtu ka reaguar ndaj liderëve institucionalë për mosveprim dhe pasivitet.
Haradinaj tha të shtunën se çelësi i suksesit për pjesën veriore të vendit është vendosja e pikave doganore dhe funksionimi i sistemit të gjyqësisë.
Sipas Haradinajt, liderët shtetëror nuk janë të aftë të udhëheqin institucionet e Kosovës dhe sipas tij ata nuk kanë fuqi dhe vizion prijës për Kosovën.
Partia ORA gjithashtu ka kritikuar qeverinë për mungesë veprimi konkret rreth protokollit të EUELX-it me Serbinë.
Kryetarja e kësaj partie Teuta Sahatçia, ka thënë se Kosova si shtet po dëshmon mungesën e kapaciteteve shtetërore dhe mungesën e veprimeve konkrete.