VOAL - Online Zëri i Shqiptarëve - FORUMI SHKODRAN FTON QYTETARËT SHKODRAN ME FIRMOS PETICIONIN KUNDËR FULLANIT

Forumi Shkodran njofton: Të dashur miq, qytetar dhe përkrahës të kauzës qytetare, njoftojmë se sot në orën 19.30 - 21.30 ishim në hyrje të pedonales, rruga "Kol Idromeno", pranë Albtelekom me nënshkrimin e peticionit për mbledhjen e parlamentit për shkarkimin e Guvernatorit.
Në vazhdim do të jemi çdo ditë tek i njëjti vend edhe paradite. Të keni me vete dhe kartat e identitetit. Të luftojmë për fenomenin që çdo hajdut, abuzues i financave tona të jetë para drejtësisë.
Një ditë më parë Forumi shkodran doli me deklaratë për shtyp në lidhje me vjedhjen e Bankës së Shqipërisë, ka kërkuar që të ketë një reagim të fortë qytetar ndaj këtij skandali madhor, siç e quan ai.
Ata nuk lanë pa etiketuar dhe politikën Shqiptare që sipas tyre po vë interesat e ngushta para atyre kombëtare.
Forumi Shkodran kërkoi shkarkimin e guvernatorit Fullani dhe sekuestrimin e pasurisë së tij.
"Si qytetarë të Shkodrës dhe taksapagues të Republikës së Shqipërisë, si zë i shoqërisë civili i munguar në qytetin e Shkodrës, Forumi Shkodran, denoncon dhe reagon ashpër ndaj grabitjes së dhomës së Thesarit më të sigurt në Republikën e Shqipërisë. Skema e vjedhjes, dështimi i plotë i mekanizmave të kontrollit, mosmbajtja e përgjegjësive apo reagimeve të vonuara prodhon keqmenaxhimin e sistemit monetar e financiar në Shqipëri.
Sikur kjo mos mjaftonte ne sot po hasim me një heshtje të politikë për këtë skandal. Deri më sot kryebankeri nuk mban asnjë përgjegjësi morale dhe profesionale . Jemi të shqetësuar që institucionet përgjegjëse nuk ndërmarrin asnjë veprim ligjor për shkarkimin e Guvernatorit dhe sekuestrimin e tij të paligjshme", tha Senida Mesi, anëtare e Forumit.
Në fund, ky forum ndërsa shpërndau broshurat me vlerën e 500 Eurove dhe foton e Fullanit, u kërkoi Shkodranëve t'i bashkohen reagimeve për shkarkimin e Guvernatorit.