VOAL - Online Zëri i Shqiptarëve - Larg interesave kombëtare dhe larg interesave të shqiptarëveSHQIPËRIA ÇFARË PARANOJE, NJË VIT E CA PARA KOHE KA HYRË NË FUSHATË ZGJEDHORENga ELIDA BUÇPAPAJ

Javën që shkoi në New York u shfaq premiera e dokumentarit "Spaçi- Simboli i Qendresës Antikomuniste ", me skenar dhe regji të Pëllumb Lamajt. Premierën e nderuan me praninë e tyre edhe ish-kongresmeni republikan i New Yorkut, Joseph Dioguardi, presidenti i Ligës Qytetare Shqiptaro Amerikane, dhe Këshilltarja e Çështjeve Ballkanike Shirli Cloyes Dioguardi, lobista të shquar në Washington D.C. të çështjes shqiptare e kritikues të ashpër të klasës politike. Në ceremoninë e shfaqjes së premierës autori i dokumentarit, i cili është një ish-banor i burgut të tmerrshëm të Spaçit do të deklaronte se "Politikanët e sotëm ende nuk i kanë dënuar krimet e komunizmit në Shqipëri". Sepse krimet e diktaturës nuk dënohen me parada hipokrite organizimesh, por me ligje dhe PD gjatë qeverisjes 7 vjeçare ka patur në dorë që t'i dënojë me ligj krimet e komunizmit, gjë që nuk e ka bërë, duke mos respektuar as programin e partisë si dhe duke zhgënjyer një pjesë të madhe të elektoratit.

Ndërsa aktualisht, një vit e ca përpara kohe, Shqipëria tashmë ka hyrë në fushatën zgjedhore. PD e personalizuar në një grusht emrash pas gati dy mandatesh synon mandatin e tretë, ndërkohë që PS pretendon të fitojë më tepër nga konsumimi i mazhorancës dhe rotacioni sesa nga ndonjë reformë vertikale brenda saj. Ndërkaq, lidërshipin e PD dhe PS, e sidomos atë i PD, e kanë zënë ethet nga përballja me dy forca të reja politike të dala nga PD, siç janë partia e Kreshnik Spahiut dhe ajo e Bamir Topit. Dhe kjo ka bërë që të mos merren me punët e shtetit por me punët e pushtetit.

Gjithçka tashmë është në funksion të propagandës, premtimeve për t'u rimarrë votën. Duke filluar prej ligjit të të përndjekurve, ku kulmi i ironisë është zhdëmtimi i menjëhershëm për vitet e tmerrit të 85 vjeçarëve, shumica e të cilëve duhet të jetë sot në atë botë, ngaqë, sa ishin në këtë botë, ata morën vetëm zhgënjim nga qeverisjet gjatë 20 viteve tranzicion.

Tani për lidërshipin e PD nuk ka gjë më të rëndësishme se fitorja në zgjedhjet e 2013. E njëjta gjë edhe për PS. Dhe të futesh në fushatë zgjedhore që në pranverën e 2012 do të thotë t'i vesh kryqin mbarëvajtjes të shtetit të së drejtës apo rolit që duhet të luajë Shqipëria në Europën Juglindore, si faktor stabiliteti apo për të ushtruar ndikimin e saj sa i përket Kosovës, të drejtave të shqiptarëve të Maqedonisë apo shqiptarëve në përgjithësi që popullojnë pesë shtete në Ballkan veç shtetit amë.

Nga Maqedonia fqinje, duke patur parasysh rrahjet e fëmijëve shqiptarë apo sesi ndeshjet nëpër stadiume shndërrohen në arena të eksplodimit të urrejtjes antishqiptare, vijnë indikacione shumë të qarta të ringjalljes të shqiptarofobisë krahasueshëm me atë të 2001 që shkaktoi shpërthimin e konfliktit për pasojë e të cilit rrodhi Marrëveshja e Ohrit e cila deri më tani ka mbetur në letër dhe e paimplementuar. Për këtë mjafton të lëvizësh në Shkup apo nëpër websitet e qeverisë së Maqedonisë ku nuk shfaqet asnjë fjalë apo gërmë në gjuhën shqipe, ndërsa në Kosovë, serbishtja është gjuhë shtetërore, pa marrë parasysh se serbët përbëjnë vetëm 5 % të popullsisë.

Në këtë kontekst të qartë jo vetëm antishqiptar, por edhe antifrymës së integrimeve europiane, do të duhej që shteti shqiptar, përmes institucioneve më të larta dhe në unison të plotë të palëve politike, të reagonte në mënyrë adekuate duke i kërkuar Maqedonisë që të vepronte si një shtet që aspiron t'i bashkangjitet BE-së dhe NATO-s. Në mbrojtje të fëmijëve shqiptarë të rrahur barbarisht nga pala maqedone, do të duhej të reagonin bashkë Bamir Topi, Sali Berisha, Jozefina Topalli, Edi Rama, Edmond Haxhinasto. Ky është detyrim i tyre kushtetues. Opinioni shqiptar nuk i suporton më në luftën e tyre të paskrupullt për pushtet. Opinioni shqiptar nuk i suporton më në shkëmbimin e batutave, në vend që të ushtrojnë rolin që kanë, edhe si përfaqësues të një shteti anëtar i NATO-s në mbrojtje të paqes dhe stabilitetin në rajon.

E njëjta situatë dramatike vjen nga Kosova, ku Serbia po i provokon shqiptarët me mbajtjen e zgjedhjeve në veriun e Kosovës, ndërkohë që Hashim Thaçi ka deklaruar më së fundmi se "Serbia definitivisht me këtë pretendim është duke provokuar një konflikt të hapur me shtetin e Kosovës që mund të ketë pasoja për gjithë rajonin dhe të gjitha angazhimet ndërkombëtare në rajon.Në përgjigje të këtij pretendimi, ne do të përdorim të gjithë forcën tonë kushtetuese dhe ligjore", tha Thaçi. Ndërsa nga shteti amë ka patur një shurdhmemecëri të plotë dhe vetëm dje Ministria e Jashtme reagoi me një deklaratë të thatë. Kur do të duhej, siç thashë, të kishim reagime në unison të plotë nga institucionet shtetërore të Shqipërisë.

Nga Kosova e Maqedonia vijnë lajme jo të mira, ndërsa në shtetin amë shkëmbehen batuta kalorësish romantikë, por jo të denja për burra shteti. Në vend të bashkërendimit ligjor dhe qendrimeve të përbashkëta, të cilat Berisha i konsumon shpesh në mënyrë sloganeske "një komb, një qendrim", Serbia apo Maqedonia marrin mesazhe që janë në antitezë të plotë kur shohin se në Shqipëri fryn erë "lufte" dhe se klasa politike shqiptare për interesa të ngushta nuk ka kurrë paqe dhe ndërsa nuk kursen fyerjet më të ulta për të gostitur kundërshtarin, mund të mbajë pozita vasaliteti të plotë pa çarë krye për interesat kombëtare në raport me fqinjët. Sepse ndërsa shajnë e pështyjnë njëri-tjetrin në shtetin amë, homologëve të tyre në Ballkan u bien nën këmbë dhe u puthin duart, pa marrë parasysh se çfarë bëhet me të drejtat e shqiptarëve.

Kim Mehmeti që sot mund të krahasohet si ndërgjegjja europiane e shqiptarëve të Maqedonisë, i intervistuar në emisionin Mbasdite në Top-Channel pas dhunës së ushtruar kundër nxënësave shqiptarë, me pezm e dhimbje, ndërsa kritikon ashpër Ali Ahmetin dhe qeveritarët shqiptarë të inkuadruar në bashkëqeverisje me Gruevskin, që tashmë janë të fokusuar tek tenderat, i bën thirrje klasës politike në Shqipëri t'i lenë "ham-hamet dhe ciu-ciut" dhe t'i kthehen veprimeve të përgjegjëshme.

Shqipërisë dhe shqiptarëve nuk u interesojnë aspak ambiciet për pushtet të krerëve të institucioneve, por u intereson që shteti i së drejtës të marrë timonin për të mbrojtur interesat kombëtare dhe qytetarët, si dhe për të mos lejuar që rajoni të precipitojë rishtaz në konflikt pasi shqiptarët në rajon vazhdojnë të trajtohen si qytetarë të dorës të dytë.

Opinioni shqiptar është i ngopur me parada propagande, të cilat nuk kanë asnjë lloj legjitimiteti, sepse rreshtohen njëlloj si batutat që konsumohen për çdo ditë duke e degjeneruar shtetin shqiptar dhe institucionet legjitime në arena gladiatorësh apo burime për tabloide gossipesh.

PYETJE PËRGJIGJE ME MINISTRIN E JASHTËM SERB VUK JEREMIÇIN

Nga ELIDA BUÇPAPAJ
E Enjte, 03.08.2012, 04:27pm

20 VJET KONFLIKTUALITET PËR PUSHTET - INTERESAT KOMBËTARE TË RREZIKUARA NGA KLASA POLITIKE

Nga ELIDA BUÇPAPAJ
E Hënë, 03.05.2012, 01:34pm

Analizë për Marrëveshjen e 24 shkurtit - KOSOVA, E FRUSTRUAR NGA BEOGRADI, THAÇI DHE NGA BE E CILA E TRAJTON SI QYTETARE TË DORËS SË DYTË, DUHET T'IU BESOJË SHBA-ve!