VOAL - Online Zëri i Shqiptarëve - AI VEND KU NUK LEJOHEN KUNDËRKANDIDATURAT, ËSHTË DIKTATURËNga SKËNDER BUÇPAPAJ

Rregulla numër një në demokraci është që për çdo vend pune, nga më i parëndësishmi, deri te ai më i rëndësishmi të konkurojnë një numër sa më i madh kandidaturash, për çdo alternativë të konkurojnë sa më shumë alternativa të tjera. Konkurenca e hapur, e lirë dhe e ndershme është premisa kryesore, absolute e suksesit në çdo fushë veprimi të njeriut dhe të shoqërisë.

Pa hyrë në arsyet dhe shkaqet, thjesht në rrafsh konstatimi, mund të themi pa më të voglin ngurim se realiteti i krijuar artificialisht pas 8 qershorit në Kosovë përbën precedentin e vetëm të llojit të tij dhe shënon vithisjen e vendit në diktaturë. Prej muajsh jemi dëshmitarë të gjithë, shqiptarë dhe të huaj, se nuk lejohet që për postin e kryetarit të Kuvendit të Kosovës të ketë të paktën një kundërkandidaturë. Nuk lejohet, me një fjalë, që për një detyrë kaq të rëndësishme, të votohen dy ose më shumë kandidatura. Ndonëse kandidaturat e partisë e cila prej muajsh nuk pranon ta lëshojë pushtetin, nuk marrin votat e mjaftueshme, ajo edhe më tej nuk lejon të jetësohet verdikti i votës së 8 qershorit, kur Sovrani e nxori, ta zëmë, parti të parë PDK-në, por nuk ia dha asaj një fitore bindëse, nuk ia dha një fitore të mjaftueshme, pra ia dha një humbje, siç e kam ngjyruar më parë, elokuente, kuptimplote.

PDK nuk e kaloi provën në të cilën e vuri Sovrani. Kjo gjithsesi nuk përbën faj në vetvete. PDK nuk lejoi që politika e Kosovës, shoqëria e Kosovës, vendi, shteti i Kosovës ta kalonin provën e pas 8 qershorit. U bë ajo mjeti kryesor, instrumenti kryesor, vegla kryesore që të pengonte konstituimin e Kuvendit të Kosovës dhe të institucioneve që dalin prej saj. E bllokoi jetën parlamentare, e bllokoi qeverisjen, i bllokoi të gjitha proceset e brendshme dhe të jashtme të jashtme të Republikës së Kosovës. Kjo përbën faj. Dhe faji i PDK sa vjen e bëhet më i rëndë, më i pandreqshëm.

Për të legjitimuar fajin e PDK-së, se gjoja kriza aktuale politike ku ajo e ka futur Kosovën nuk përbëka precedent, shpesh, krejt pa vend, po përmendet rasti i Belgjikës. Janë dy realitete krejtësisht të pakrahasueshme. Belgjika, me dy bashkësi të mëdha kryesore, flamandët dhe valonët, prej vitit 1970 nuk ka më parti belge, por vetëm parti flamande ose valone. Kjo ka çuar në krizën e parë të madhe institucionale pas zgjedhjeve të qershorit të vitit 2007 kur u deshën 196 ditë për të krijuar një qeveri të re. Në nëntor 2007 në Bruksel u zhvillua një manifestim populor në favor të unitetit të vendit, kundër projektit për ta shndërruar Belgjikën në një konfederatë shtetesh autonome mbi baza etno-linguistike.

Zgjedhjet e mëparshme të përgjithshme, të vitit 2003, kishin rezultuar në një koalicion midis partive socialiste, asaj SP.a/Spirit (Flamande), e gjashta në renditjen e partive parlamentare, dhe Partisë Socialiste (Frankofone), e treta në renditje, si dhe partive tliberaldemokratike centriste VLD/Vivant (Flamande), e katërta në renditje, e MR (Frankofone), e dyta në renditje, me Guy Verhofstadt të VLD duke mbajtur pozitën e Kryeministrit të Belgjikës deri më 2007. Kështu partia e parë (CD&V) dhe ajo e pestë (VLD e Hapur), mbetën në opozitë.

Largimi i VLD nga qeveria çoi në zgjedhje të parakoshme. Belgjika do të shënonte rekord të ri pas zgjedhjeve të vitit 2010, kur për 541 ditë nuk ka zyrtarisht një qeveri. Kjo krizë u zgjidh në dhjetor të vitit 2011, kur socialisti valon Elio Di Rupo arriti të formojë një koalicion qeveritar.

Krijimin e qeverisë së re e pengonte pikërisht partia që dilte e para në zgjedhje, partia nacionaliste flamande, e quajtur Aleanca e Re Flamande. Për 541 ditë Belgjika u drejtua nga një qeveri kujdestare. Kriza u zgjidh kur partia e dytë, Partia Socialiste Valone arriti të krijojë koalicionin e ri qeveritar. Partia e parë mbeti në opozitë.
Parlamenti belg përbëhet nga dy dhoma. Dhoma e Përfaqësuesve ka 150 vende. Për të krijuar shumicën duhen të paktën 76 vende. Senati ka 71 vende. Për të krijuar shumicën duhen të paktën 36 vende.

Precedentët e Belgjikës nuk mund të merren shembull as nuk mund të jenë bazë për të legjitimuar fajin e PDK-së. Realitetet e tyre, konfiguracionet, traditat janë të ndryshme nga të Kosovës. Falë kësaj, Kosova arriti të krijojë koalicionin e ri qeveritar brenda pak ditësh. Këtë koalicion qeveritar, si në precedentët belgë, nuk e krijoi dot partia e parë, por e krijoi partia e dytë, nuk e krijoi dot PDK, por e krijoi LDK.

Për të bllokuar proceset në Kosovë shërbeu, së pari, precedenti i krijuar nga Presidentja. Pa nevojë, pa pritur që KQZ të certifikonte rezultatet e zgjedhjeve, kur vinte radha e saj për të vepruar, ajo e dërgoi 8 qershorin në Gjykatën Kushtetuese. Bllokimit më tej i shërbeu, së dyti, roli i Flora Brovinës, si deputetja më e moshuar në Kuvendin e Kosovës. Brovina nuk e përfilli rendin e ditës të përcaktuar nga mbledhja e kryesisë së mëparshme të Kuvendit, sipas rregullores ekzistuese të këtij Kuvendi. Sa herë që i ngatërroheshin nëpër fletë edhe fletët e rendit të përcaktuar të ditës, asaj ia tërhiqnin vëmendjen nga radhët e para të platesë Thaçi me të tjerë. Kur, në njërën prej këtyre fletëve, ajo iu kërkoi partive të tjera të jepnin kandidaturat e tyre për kryetar Kuvendi, menjëherë ia tërhoqën vëmendjen dhe ajo bëri marsh prapa. Bllokimit i shërbeu, së treti, precedenti i Gjykatës Kushtetuese, kur e krijoi postin e kryesueses së seancave konstitutuese.

Kurdo që të ndodhë zhbllokimi i konstituimit të Kuvendit të Kosovës, patjetër do të rikthehet në fuqi rendi i ditës i miratuar nga kryesia e mëparshme e Kuvendit, rend dite i cili duhej të zbatohej më 17 korrik. Kryesuesja e Kuvendit apo çdo kryesues a kryesuese tjetër thjesht i përmbahet atij rendi dite të cilin e rrëzoi kundërligjshëm Gjykata Kushtetuese e Kosovës. Ajo ose ai nuk krijon rend dite, nuk porosit rend dite, thjesht iu përmbahet letrave që gjen para vetes, ato minuta derisa, vendin ku është ulur, ia lëshon kryetarit të posazgjedhur të Kuvendit.

Duke u kthyer tek konteksti belg, do shtuar se realitetit të Kosovës ende i mungon realiteti i manifestimit popullor në favor të zgjidhjes që i ka dhënë situatës koalicioni paszgjedhor VLAN, zgjidhje që është bllokuar nga PDK. Pra, të jenë syhapur dhe mendjehapur të gjithë: Kosovës në këta muaj nuk i mungon zgjidhja, por Kosovës i është bllokuar zgjidhja. Ky është realiteti që e fundos Kosovën në diktaturë.

Ky përfundim që nxjerr unë, mund të shëmbëllejë i tepëruar, ndoshta i parakohshëm, ndoshta i pasaktë. Fjala që shënon këtë dukuri, pra diktaturën, ka hyrë në fondin aktiv prej vitit 1326 dhe emërton sundimin absolut e të pakundërshtueshëm. Ky sundim realizohet, thonë fjalorët, nga një qeveri autoritare që e përqëndron gjithë pushtetin në një organ të vetëm kolegjial ose në personin e vetëm të diktatorit. Unë mendoj se realiteti konkret në Kosovë sot i përmbush të tri kriteret e mësipërme.

Në këto rrethana, problemi më shqetësues është mënyra se si po legjitimohet ky realitet në Kosovë. Jemi para faktit se një palë po bën gjithçka, në të gjitha rrafshet e brendshme dhe të jashtme të vendit, për ta legjitimuar diktaturën e saj, ndërsa palët e tjera, politika, shoqëria e tjerë, nuk po bëjmë pothuajse asgjë për të mos lejuar legjitimimin e kësaj diktature.

Ky është eksperimenti ku jemi përfshirë të gjithë, njëherësh faktorë dhe spektatorë, lojtarë, vëzhgues dhe kundrues. Kjo është prova ku është vënë Republika e Kosovës dhe ne të gjithë.

©

JERMI TOTALITAR I PDK - OSE NËNSHTRIM, OSE ZGJEDHJE TË JASHTËZAKONSHME
Nga SKËNDER BUÇPAPAJ
E Enjte, 11.06.2014, 09:26am

A E UDHËHEQ LDK KOALICIONIN PASZGJEDHOR?
Nga SKËNDER BUÇPAPAJ

E Mërkurë, 10.29.2014, 10:21am
SERBIA E TRAJTON EDHE SHQIPËRINË ME FUSNOTË
Nga SKËNDER BUÇPAPAJ

E Djelë, 10.19.2014, 08:56am
KUVENDI I KOSOVËS - VENDIMET QË MUND TË MERREN ME SHUMICË TË THJESHTË NUK KA PSE TË SHTYHEN PËR MË VONË
Nga SKËNDER BUÇPAPAJ

8 QERSHORI - NYJA GORDIANE
Nga SKËNDER BUÇPAPAJ
E Mërkurë, 10.01.2014, 10:55amPAPA YNË
Nga SKËNDER BUÇPAPAJ

E Hënë, 09.22.2014, 08:47am

PRESIDENTJA E HODHI GURIN NË LUMË, NJË MIJË TË ZGJUAR NUK E NXJERRIN
Nga SKËNDER BUÇPAPAJ
E Mërkurë, 08.27.2014, 06:59am
TRI JOTË JETIKE TË KOSOVËS
Nga SKËNDER BUÇPAPAJ

E Shtunë, 08.23.2014, 09:05am

REFORMA ORIGJINALE E KRYEMINISTRIT RAMA
Domosdoshmëria e një revanshi femëror në zyrat e partisë dhe të shtetit
Nga SKËNDER BUÇPAPAJ

E Hënë, 08.18.2014, 08:25am
PRANDAJ KUVENDI I RI NUK PO LICENSOHET
Nga SKËNDER BUÇPAPAJ

E Mërkurë, 08.06.2014, 02:30pm

KOSOVA POST-TRAUMË
Nga SKËNDER BUÇPAPAJ

E Premte, 08.01.2014, 04:58pm