VOAL - Online Zëri i Shqiptarëve - FATOS KLOSI - FULLANI ËSHTË FAJTOR PËR CËNIMIN E SIGURISË KOMBËTARE, TË JAPË DORËHEQJEN

TIRANE - Ish-kreu i SHISH, Fatos Klosi në një intervistë për gazetën 'Panorama' thotë se me grabitjen e Bankës së Shqipërisë është cenuar siguria kombëtare, ndërsa bën fajtor për këtë Guvernatorin Fullani.

Sipas tij, Fullani është votuar nga përfaqësuesit e popullit në Parlament dhe është ai përgjegjës për mirëfunksionimin ose keqfunksionimin e institucionit që drejton.

Në Bankën e Shqipërisë kemi një tjetër skandal me paranë publike. Si qytetar i këtij vendi, sa e rëndë është kjo ngjarje?
Është një ngjarje e rëndë dhe çuditërisht për mënyrën se si janë sjellë punonjësit e Bankës, ngjan shumë me vjedhjen e Thesarit të Shtetit shumë vite më parë. Edhe atje kishte muaj dhe vite të tëra që nuk ishte hapur asnjëherë dera e thesarit dhe nuk dinte njeri se çfarë kishte brenda. E dinin në letra, por asnjë kontroll apo inventar nuk ishte bërë. E njëjta gjë dhe këtu, deklaron punonjësi që unë kam 4 vjet që vjedh dhe asnjë nga strukturat e Bankës nuk e dinte këtë gjë sepse nuk ishin bërë inventarët. Me sa di unë, të gjitha institucionet e shtetit, në fund të vitit bëjnë inventarin e të gjitha materialeve që zotëron një institucion. Kjo nuk ishte bërë në Bankën e Shqipërisë, ku mbahen paratë e reja, por dhe të konsumuara apo që dalin jashtë qarkullimit.

Ju keni qenë drejtues i institucionit që garanton sigurinë kombëtare në vend. Por keni dijeni, nëse ka protokolle strikte se si veprohet, se si ruhen apo kontrollohen paratë në Bankën e Shqipërisë?
Në një institucion ku ruhet paraja duhet të ketë procedura shumë të forta për ruajtjen e parasë, sepse një bllok kartëmonedhash mund të merret lehtë. Janë këto procedura strikte që parandalojnë vjedhjen. Po nuk pati kontroll te paraja stok, nuk merret vesh sa janë në gjendje. Jam i sigurt që bota prej kohësh ka përcaktuar procedura që rregullojnë funksionimin e këtyre institucioneve të rëndësisë së veçantë për të parandaluar çdo ngjarje të kësaj natyre. E keqja jonë e madhe është se të gjitha procedurat janë të shkruara, sepse nuk janë shpikur, por janë marrë nga përvojat më të mira botërore, por nuk zbatohen, nuk merren seriozisht. Njerëzit i marrin lehtë, "hajde se nuk ka se çfarë të ndodhë në Bankën e Shqipërisë", por ja që ndodhi. Opinioni im është se në çdo rast të rëndësishëm kur ndodhin ngjarje të tilla, çdo gjë ka ardhur pse nuk janë zbatuar procedurat. Për mua është papërgjegjshmëri totale dhe këtu unë shoh një problem të madh. Kur ka papërgjegjshmëri të tillë në një institucion si Banka e Shqipërisë, merreni me mend se çfarë ndodh në institucionet e tjera. Unë e marr me mend se në të gjitha institucionet kryesore ka një lloj papërgjegjshmërie dhe besohet më shumë te ndershmëria e njerëzve sesa te rregullat e punës apo të institucionit.