VOAL - Online Zëri i Shqiptarëve - MIRËNJOHJE AMERIKËS!Nga SKËNDER BUÇPAPAJ

Është pranuar me të drejtë se viti 2012 nuk do të kishte kuptim të kremtohej si vit jubilar i 100 vjetorit të pavarësisë së Shqipërisë nëse tashmë Kosova nuk do të kishte fituar pavarësinë. 17 shkurti i vitit 2008, pra, është një plotës i 28 Nëntorit 1912, kur Shqipëria shpallej e pavarur në të gjithë territorin e saj prej rreth 120 mijë kilometrash katrore. Nocioni politik Shqipëri do të zhdukej plotësisht nga harta nëse nuk do të ishte Udrou Uillson, presidenti i 28 i Shteteve të Bashkuara të Amerikës që do ta merrte në mbrojtje këtë ekzistencë. Ashtu si nuk do të ekzistonte Kosova më nëse Bill Klinton, presidenti i 42 i Shteteve të Bashkuara të Amerikës nuk do ta merrte në mbrojtje Kosovën duke përzënë makinerinë e përbindshme gjakatare serbomadhe të Sllobodan Millosheviçit, duke e çliruar Kosovën një herë e përgjithmonë. Do të ishte Xhorxh W. Bush, Presidenti i 43 i Shteteve të Bashkuara të Amerikës ai që do të kurorëzonte pavarësinë e Republikës së Kosovës, ashtu siç e kishte projektuar themeluesi i saj, Presidenti Ibrahim Rugova.

Falë Shteteve të Bashkuara të Amerikës, me emër të Zotit të Madh, me këtë 17 Shkurt, tashmë festë e Kosovës dhe e të gjithë shqiptarëve, ne e kemi më të plotë edhe realizimin e idealit të 28 Nëntorit 1912, e kemi edhe më konkret realizimin tonë kombëtar. Në miqësi, aleancë dhe partneritet me Shtetet e Bashkuara të Amerikës, Republika e Shqipërisë është prej rreth tri vjetësh anëtare e Organizatës së Paktit të Atlantikut Verior (NATO). Në miqësi, aleancë dhe partneritet me Shtetet e Bashkuara të Amerikës edhe Republika e Kosovës do të jetë anëtare e NATOS. Në miqësi, aleancë dhe partneritet me Shtetet e Bashkuara të Amerikës, Republika e Shqipërisë dhe Republika e Kosovës do të jenë edhe anëtare të Bashkimit Evropian, kombi shqiptar dhe atdheu ynë do të jenë gjithnjë e më shumë një faktor i përbashkët, një realitet i bashkuar, një ideal i realizuar sipas projektit të atij 28 Nëntori 2012, kur lartohej flamuri ynë kombëtar, flamuri më i vjetër i të gjitha kombeve të botës, flamuri më domethënës i të gjitha kombeve të botës.

Falë Shteteve të Bashkuara të Amerikës, me emër të Zotit të Madh, ne shqiptarët do t'ia kthejmë lavdinë, përparimin, mirëqenien atdheut tonë në të gjithë hapësirën e tij në Republikën e Shqipërisë, në Republikën e Kosovës, në Maqedoni, në Malin e Zi, në Preshevë, në Medvegje, në Bujanoc, në Çamëri. Në miqësi, aleancë dhe partneritet gjithnjë më të ngushtë, gjithnjë e më të fortë me Shtetet e Bashkuara të Amerikës ne shqiptarët do t'ia rikthejmë vetes plotësisht statusin e njërit prej kombeve themeluese të qytetërimit evropian dhe të qytetërimit perëndimor në tërësi, do t'ia kthejmë Evropës dhe Perëndimit kujtesën e Ilirisë së Bardhylit, Teutës, Gentit, Batos e të tjerëve. Në miqësi dhe aleancë me Shtetet e Bashkuara të Amerikës, nën flamurin kuq me shqiponjën e zezë dykrenore të Gjergj Kastriotit Skënderbeut ne shqiptarët do të njihemi si kombi që u flijuam në themelet e Evropës moderne dhe të Perëndimit modern. Në miqësi, aleancë dhe partneritet me Shtetet e Bashkuara të Amerikës gjaku i luftëtarëve të Ushtrisë Çlirimtare të Kosovës, gjaku i dëshmorëve dhe heronjve të panumërt i derdhur për lirinë e Kosovës dhe për lirinë kombëtare në përgjithësi gjatë shekujve do të shpërblehet me përparim, lartësimin dhe madhërimin e kombit tonë.

Prandaj çdo ditë që agon dhe ngryset, ne shqiptarët t'ua shprehim mirënjohjen tonë Shteteve të Bashkuara të Amerikës dhe të jemi gjithnjë e gjithmonë përkrah Shteteve të Bashkuara të Amerikës. Falë Shteteve të Bashkuara të Amerikës, me emër të Zotit, vizionet tona kombëtare do të jenë vizione të qytetërimit modern evropian dhe perëndimor. Falë Shteteve të Bashkuara të Amerikës, me emër të Zotit, për hir të qytetërimit evropian dhe perëndimor, për hir të qëndrueshmërisë, paqes, përparimit, ne do të kemi realizimin e ribashkimit të Shqipërisë.

DOBIA KRYESORE E KATASTROFAVE NATYRORE

Nga SKËNDER BUÇPAPAJ

DY FJALË PARA PROTESTËS SË PRITSHME TË VETËVENDOSJES

Nga SKËNDER BUÇPAPAJ

NJË VIT HARRAKAT

Nga SKËNDER BUÇPAPAJ

HAVELI QË E PATËM, HAVELI QË NUK E PATËM

Nga SKËNDER BUÇPAPAJ

SINOPSIS STINORIT TË SIVJETËM TË ZJARREVE