VOAL - Online Zëri i Shqiptarëve - Shkruar më 21 janar 2006 (Ribotim)IBRAHIM RUGOVA - EMRI I SHTETIT TË PAVARUR DHE SOVRAN TË KOSOVËSNga SKËNDER BUÇPAPAJ

Kombi shqiptar ka mbetur pa frymë e pa zë këtë të shtunë, këtë ditë që nuk duhej të agonte dhe as të ngrysej kurrë. Njeriu më i madh i kombit shqiptar, babai i pavarësisë së Kosovës, Presidenti Ibrahim Rugova ndërroi jetë. Vizionari i pashoq evropian, burrështetasi i vendosur perëndimor, kampioni i shqiptarizmit në një jetë të pasur me sfidat më epokale, u përball me kancerin mizor të barbarisë pushtuese serbe, u përball me kancerin mizor të zvarritjeve të pafund të bashkësisë ndërkombëtare ndaj proceseve të Kosovës, u përball me të gjitha llojet e kancereve antishqiptare dhe triumfoi kundër tyre. Por Presidenti Ibrahim Rugova nuk arriti dot të triumfojë kundër kancerit fizik, i cili brenda disa muajsh rrëzoi për vdekje kollosin e lirisë shqiptare.

Presidenti Ibrahim Rugova ia la Kosovës dhe kombit të vet një trashëgimi gjeniale, shtetin e pavarur dhe sovran të Kosovës, i cili ndodhet në prag të njohjes zyrtare nga ana e miqve amerikanë dhe evropianë, ditë të cilën Presidenti Ibrahim Rugova nuk arriti ta jetojë kurrë. Presidenti Ibrahim Rugova ia la Evropës një trashëgimi gjeniale, paqen e kontinentit, e cila i ka themelet pikërisht në shtetin e pavarur dhe sovran të Kosovës, pra në veprën e vizionit hyjnore, të cilën e krijoi, e mishëroi dhe përkreu pikërisht Presidenti Ibrahim Rugova. Presidenti Ibrahim Rugova ia la Perëndimit Evroatlantik një trashëgimi gjeniale, besën e pashoqe shqiptare, miqësinë dhe aleancën shqiptare, thesarin më të madh të kultivuar nga kombi ynë nëpër kohëra.

Në periudhën më tragjike dhe më të errët të jetës së kombit shqiptar, Presidenti Ibrahim Rugova u shndërrua në pishtar për ta prirë Kosovën dhe kombin duke pasur Yll Polar për të sotmen dhe të ardhmen e kombit tonë Perëndimin, në familjen tonë të cilën të parët tanë ilirë e themeluan, në familjen tonë së cilës i kemi përkitur dhe i përkasim përgjatë mijëvjeçarëve. Me burrërinë dhe vendosmërinë e pashoqe këmbëngulëse, Presidenti Ibrahim Rugova hapi rrugë dhe zgjeroi rrugë të sigurta për të sotmen dhe të ardhmen e Kosovës dhe të kombit shqiptar, duke e prirë Kosovën në rrugën e madhërueshme dhe të pagabueshme të Zotit. Me vizionaritetin e tij gjenial evropian perëndimor, Presidenti Ibrahim Rugova vendosi piketa nga duhet të kalojë Kosova dhe kombi shqiptar në kohët e ardhshme dhe në epokat e ardhshme.

Duke u ndarë nga jeta, duke shkuar në amshimin e pasosur, Presidenti Ibrahim Rugova e la Kosovën jetime, e la kombin shqiptar jetim. Kurrë më parë në histori, si në rastin e ndarjes së Presidentit Ibrahim Rugova nga jeta, nuk ka ndodhur që çdo individ shqiptar të japë dhe të marrë ngushëllime njëkohësisht si në rastin e largimit nga jeta të viganit të pashoq të historisë sonë kombëtare, njeriut që ua jep emrin dy shekujve tanë. Kurrë më parë në histori, si në rastin e ndarjes së Presidentit Ibrahim Rugova nga jeta, nuk ka ndodhur që një komb të ndjehet jetim edhe si kolektivitet, edhe si përbërje individësh.

Presidenti Ibrahim Rugova është emri i shtetit të pavarur dhe sovran të Kosovës, anëtar i Bashkimit Evropian, anëtar i NATO-s, në miqësi të përhershme me Shtetet e Bashkuara të Amerikës, në marrëdhënie të mira me fqinjtë, në harmoni me qytetarët e saj dhe midis qytetarëve të saj. Presidenti Ibrahim Rugova është emri i kapitullit më të lavdishëm, më të artë, të gdhendur me gërmat më të arta, të historisë së Kosovës, të historisë së krejt kombit shqiptar, të historisë së krejt atdheut shqiptar. Presidenti Ibrahim Rugova është emri i njërit prej kapitujve më të ndritshëm të evropianizmit bashkëkohor, është përfaqësuesi më i pavdekshëm i evropianizmit më të mirëfilltë, evropianizmit shqiptar.

Për shekuj të shekujve, Presidenti Ibrahim Rugova do të mbetet kampion i intelektualit shqiptar, i politikanit shqiptar, i burrështetasit shqiptar, i njeriut shqiptar, i gjeniut shqiptar. Vëllazëria shqiptare, me emrin e tij në gojë, në shpirt dhe në zemër do ta çojë përpara çështjen shqiptare duke vazhduar me besnikëri filozofinë e lirisë kombëtare, filozofinë e pavarësisë kombëtare, filozofinë e bashkimit kombëtar, filozofinë e evropianitetit kombëtar të cilën e shkroi me mendimet e tij, me veprën e tij, me përpjekjet e tij, me luftën e tij të pashoqe Presidenti Ibrahim Rugova. Duke hyrë në përjetësi, Presidenti Ibrahim Rugova do të ketë përherë aureolën e pavdekëshme të Heroit Kombëtar të Shqiptarëve, krahas Gjergj Kastriotit Skënderbeut, krahas Ismail Qemalit, krahas Ahmet Zogut dhe të gjithë viganëve të tjerë të cilët me jetën e tyre e bënë të përjetëshëm kombin tonë, lavdinë e kombit tonë.

©