Protesta për dorëheqjen e guvernatorit Fullani ZËRI I AMERIKËS - NË KËSHILLIN MBIKQYRËS NUK U PROPOZUA SHKARKIMI I FULLANIT
E Enjte, 08.07.2014, 07:22pm (GMT+1)
Protestuesit shprehën shqetësim për vjedhjen e 7 milionë dollarëve të Bankës së Shqipërisë dhe hetimin pas arrestimit të 10 personave.
Veprimtarë të shoqërisë civile dhe qytetarë të thjeshtë zhvilluan përsëri sot një protestë para zyrave të Bankës së Shqipërisë, duke kërkuar dorëheqjen e guvernatorit Ardian Fullani.
Tubimi protestues, i njoftuar përmes rrjeteve sociale, zgjati 4 orë dhe, sipas organizatorëve, ka si qëllim dorëheqjen ose shkarkimin e zotit Fullani nga detyra e guvernatorit, pasi në institucionin që ai drejton u vodhën mbi 7 milionë dollarë në 5 vjet dhe janë arrestuar 10 persona.
Këshillimi Mbikëqyrës nuk propozoi mbrëmë shkarkimin e tij, por tha se ngjarja e rëndë erdhi nga shkeljet e disa punonjësve, tashmë të arrestuar. Qeveria deklaroi se ky është një akt i rëndë kriminal dhe një sfidë për drejtësinë.
Kjo është hera e tretë që shoqëria civile proteston pranë zyrave të Bankës së Shqipërisë, duke kërkuar largimin nga detyra të Guvernatorit Fullani. Mikrofoni ishte i hapur për të gjithë qytetarët pjesëmarrës në protestë.
Folësit shprehën shqetësimin e tyre për vjedhjen e Bankës, duke kërkuar miradministrimin e sistemit bankar dhe ekonomisë së vendit. Veprimtarët njoftuan se protesta të tjera do t'i zhvillojnë pranë parlamentit dhe qeverisë për të kërkuar shkarkimin e zotit Fullani.
www.voal-online.ch
|