KOALICIONI LDK-AAK-NISMA I INTERESUAR PËR QEVERI STABËL - ME VETËVENDOSJEN
E Premte, 08.08.2014, 07:01am (GMT+1)
Blloku trepalësh LDK-AAK-Nisma shpreson ende që ta përfshijë Lëvizjen Vetëvendosje në Qeveri, me pretendimin për ta drejtuar vendin në mandatin e ardhshëm, edhe pse disa tentativa për marrëveshje kanë dështuar.
Nënkryetari i AAK-së, Ahmet Isufi, thotë se është dëshirë e koalicionit paszgjedhor që të ketë përafrim të qëndrimeve, me qëllim të formimit të një Qeverie stabël.
Duke folur për Politiko.net, Isufi pohon se janë të hapur që pas vendimit të Gjykatës Kushtetuese të vazhdojnë bisedimet me Vetëvendosjen.
"Ne do të jemi në kontakt me Vetëvendosjen dhe do të shohim pas vendimit të Gjykatës se cilët do të jenë hapat e mëtutjeshëm. Dëshira jonë është që të përafrohen qëndrimet, në mënyrë që të kemi një Qeveri stabël, e cila garanton funksionim normal të shtetit", tha Isufi.
Lëvizja Vetëvendosje ia ka bërë të qartë Bllokut Opozitar se nuk do të pranojë të hyjë në Qeveri nëse nuk e lejojnë që ta udhëheqë Dialogun vetë. Sekretari i Përgjithshëm i Vetëvendosjes, Dardan Molliqaj, ka thënë se nga pesë kriteret që ka vënë kjo Lëvizje, ka mbetur vetëm edhe çështja e Dialogut që të pranohet nga Koalicioni LDK-AAK-Nisma.
Sipas tij, nuk ka ndonjë arsye që ky kusht të mos pranohet.
I pyetur nëse Blloku do të pranojë që Dialogu të drejtohet nga Vetëvendosje, Ahmet Isufi nuk ka dashur të përgjigjet konkretisht, por ka thënë se dëshirojnë që të ketë një gjithëpërfshirje të spektrit politik, LDK-AAK-Nisma dhe Vetëvendosje, në mënyrë që vendi të ketë qëndrueshmëri dhe një funksionim normal.
www.voal-online.ch
|