Këtë javë, Partia Demokrate e Shteteve të Bashkuara mban Kuvendin e saj për të
ri-emëruar zyrtarisht si kandidat të saj edhe për një afat tjetër katër vjeçar,
Presidentin Barak Obama dhe Zevëndës-Presidentin Xho Bajdën, për tu përballur
në zgjedhjet e përgjithëshme për president në nëntor me kandidatët e Partisë
Republikane Mit Romni dhe Pol Rajën, të cilët në Kuvendn e Partisë Republikane
javën që kaloi, pranuan emërimin si kandidat për president dhe zevëndës
president nga partia e tyre.
Prej datës 4 deri më 6 shtator, mbi 6,000 delegatë nga çdo shtet e territor i
Shteteve të Bashkuara -- më shumë se çdo herë tjetër në histori -- do të
mblidhen në qytetin Çarlotë të Karolinës së Veriut për të marrë pjesë në
Kuvendin e Partisë Demokrate, ku Presidenti Barak Obama do të pranojë emërimin
e tij si kandidat i kësaj partie për president të Shteteve të Bashkuara. Katër
vjetë më parë, Zoti Obama u zgjodh presidenti i 44-ët i Shteteve të Bashkuara.
Një listë e gjatë folësish është përgatitur me emërat e senatorëve,
kongresistëve dhe governatorëve demeokratë, si dhe aktivistëve të Partisë
Demokrate, të cilët, me fjalimet e tyre gjatë punimeve të kuvendit prej tri
ditësh, do t'u drejtohen delegatëve dhe votuesve amerikanë për t'i bindur ata
se Presidenti Obama dhe Zëvendës-presidenti Bajdën meritojnë edhe katër vjetë
të tjera në Shtëpinë e Bardhë. Ndër folësit e parë dhe kryesorë do të jetë
Zonja e parë, Miçhellë Oama dhe ish-presidenti Xhimi Karter. Pritet që ditën e
dytë të kuvendit, ish-Presidenti Bill Klinton, i cili gëzon gjithnjë
popullaritet të konsiderueshëm në radhët e demokratëve, dhe është një ndër
oratorët më të mirë të Partisë Demokrate, ta tundë kuvendin me fjalimin e tij.
Një ndër fjalimet kryesore do të jetë edhe ai i Senatorit Xhon Kerry i shtetit
Masaçusets, dhe ish-kandidat për president i Partisë Demokrate kundër
ish-presdientit Xhorch Bush më 2004 -- i cili tani në pozitën e tij si kryetar
i Komisionit të Senatit për Punë të Jashtme, pritet të flasë mbi sukseset e
administratës së Presidentit Obama në fushën e politikës së jashtme gjatë katër
vjetëve të kaluar. Por, fjalimet kryesore të kuvendit, natyrisht, rezervohen
për zotërinjtë Obama dhe Bajdën, të cilët pritet që ditën e tretë të kuvendit
-- të Ënjtën mbrëma-- të pranojnë emërimin nga kuvendi dhe të zyrtarizohen si
kandidatë të Partisë Demokrate për president dhe zëvendës-president të Shteteve
të Bashkuara.
Kuvendet e dy partive kryesore në Amerikë, për emërimin e kandidatëve të tyre
për president janë natyrisht ngjarje të rëndësishme politike për amerikanët.
Por si të tilla, ato tërheqin jo vetëm vëmendjen e medias amerikane, por edhe
interesimin e medias ndërkombëtare, për këtë proces politik që është unik për
zgjedhjen e udhëheqsit të ardhëshëm të Amerikës, politikat e të cilit do të infuencojnë
jo vetëm jetën e përgjithshme në këtë vend, por falë rolit të Amerikës si
supërfuqia e vetme në botë, dashtë e pa dashtë influencon edhe marrëdhënjet
ndërkombëtare. Ashtu siç ndodhi javën e kaluar në Kuvendin e Partisë
Republikane në Tampa të shtetit Florida, edhe në Kuvendin e Partisë Demokrate
këtë javë, do të marrin pjesë përfaqsues politikë të ftuar nga shumë vende si
edhe përfaqsues të medias ndërkombëtare nga e gjithë bota.
Gjithashtu, siç është zakon dhe traditë për mbledhje të tilla kombëtare këtu në
Amerikë, grupe të ndryshme protestuesish kanë njoftuar planet e tyre se do të
jenë të pranishme edhe gjatë punimeve Kuvendit të Partisë Demokrate në qytetin
Sharlotë të Karolinës së Veriut, për të venë në dukje moskënaqësitë e tyre dhe
për të protestuar kundër politikave të administratës Obama.
Zoti Obama u zgjodhë president i këtij vendi, katër vjetë më parë, në një valë
moskënaqësie popullore që kishte përfshirë vendin ndaj gjëndjes së keqe
ekonomike dhe nga lodhja e popullit amerikan me luftërat në Irak dhe
Afganistan. Gjatë fushatës për president, katër jetë më parë, me parullat
''Shpresë dhe Ndryshim'' dhe ''Ndryshim në të cilin mund të besojmë'', Zoti
Obama premtoi shumë gjëra, përfshirë edhe reformimin e sistemit shëndetsor të
Amerikës. Megjithëse ky ligj kundërshtohet ashpër nga republikanët dhe nga një
shumicë e popullit amerikan, Gjykata e Lartë ka vendosur se pjesët kryesore të
këtij legjislacioni janë kushtetuse dhe sit ë tilla qendrojnë. Presidenti Obama
ose zëdhënsit e tij, gjatë kuvendit, do të mbrojnë, ato që mund të konsiderohen
si arritjet dhe sukseset e shënuara të administratës së tijë gjatë katër
vjetëve të kaluara, përfshirë edhe stimulimin ekonomik për të shpëtuar nga
falimentimi kompanitë e automobilave Xheneral Motors dhe Krajslër. Në fushën e
politikës së jashtme, administrata e presidentit Obama do të marrë kredinë për
vrasjen e krye-terroristit Osama bin Laden, gjatë një operacioni ushtarak
super-sekret në Pakistan. Administrata e Presidentit Obama ka treguar
gjithashtu një agresivitet të jashtzakonshëm ndaj eliminimit të terroristëve të
ndryshëm, në Lindjen e Mesme dhe në Pakistan. Ndër të tjera, ai pritet të
theksojë si gjithashtu edhe shtimin e numërit të forcave ushtarake në
Afganistan dhe nënshkrimin e një traktati për kontrollin e armëve me Rusinë,
bashkpunimin me NATO-n dhe me organizatën e Kombeve të Bashkuara për zgjidhjen
e problemeve botërore, si sukese në fushën e marrëdhënjeve ndërkombëtare.
Për arsye të gjëndjes së vështirë ekonomike, republikanët, por edhe disa
analistë politikë bëjnë krahasime midis administratës së Presidentit Obama dhe
administratës së ish-presidentit Xhimi Karter duke thënë se pyetja që
ish-presidenti Ronald Reagan e bëri të famëshme në fushatën e tij kundër
ish-Presidentit Karter, ''A jeni tani më mirë se katër vjetë më parë?'' është
me vend edhe këtë vit dhe se do të përdoret nga republikanët në fushatën kundër
presidentit Obama, të bindur se shumica e amerikanëve do të përgjigjeshin në
mënyrë negative. Por, në pritje të kësaj pyetjeje, zëdhënsit e Presidentit
Obama janë gati me përgjigjen e tyre, përfshirë edhe njërin prej këshilltarëve
kryesorë të Presdientit Obama, Zotin Dejvid Aksëlrod, i cili i tha rrjetit të
televizionit amerikan Foks se ''mund të them se jemi në gjëndje më të mire,
përsa i përket ekonomisë, se ç'ishim katër vjetë më parë --në kuptimin se kur
Presidenti Obama filloi nga detyra, ne ishim duke humbur 800.000 punë në muaj,
'' dhe shtoi se ai, ''mendon se amerikanët e kuptojnë se kriza që arrijti
kulmin në vitin 2008, mori disa vite për të arritur nivelin në të cilin ishte
në vitin 2009 dhe se do të marrë kohë të dalim nga këjo krizë'' përfundoi
këshilltari i Presdientit Obama.
Por republikanët venë në dukje shifrat që flasin për një gjëndje ekonomike të
vështirë, përfshirë papunësinë që tani është në nivelin 8,3 për qind si dhe
borxhin kombëtar që vjen e rritet çdo ditë, duke arritur në 16 trilionë
dollarë. Për më tepër, në një sondazh të kohëve të fundit nga agjencia e
lajmeve Reuters dhe firma Ipsos thuhet se 76 për qind e amerikanëve besojnë se
vendi është në rrugë të gabuar dhe 73 për qind të atyre që u pyetën thanë
gjithashtu se nuk janë optimistë për krijimin e vendeve të reja të punës.
Zgjedhja e Presidentit Obama katër vjet më parë ishte si diçka krejtësisht e papritur
në politikën amerikane. Pothuaj pas katër vjetëve në Shtëpinë e Bardhë,
Presidenti Obama mund të mburret me disa suksese në politikën e jashtme, por
ekonomia mbetet për te një problem serioz. Gjatë Kuvendit të Partisë Demokrate
këtë javë, folësit kryesorë demokratë si dhe vet presidenti Obama dhe
zëvendës-presidenti Bajdën për të fituar votën e tyre në nëntor -- do të
përpiqen të bindin amerikanët se ekonomia është duke u përmirësuar dhe se
gjëndja ekonomiko-financiare në përgjithësi është stabilizuar. Por pas të
gjitha deklaratave dhe fjalimeve të zjarrta, fjalën e fundit do ta kenë
votuesit amerikanë në zgjedhjet e përgjithshëme në nëntor.
Comments (0)
Dërgoja shokut
Printo
