VOAL - Online Zëri i Shqiptarëve - VIKTIMAT E KOMUNIZMIT, MBETUR PA VARR E DREJTËSI, AKUZOJNË KLASËN POLITIKE SHQIPTARENga ELIDA BUÇPAPAJ

E lexova me një frymë opinionin e gazetarit të shquar shqiptaro-amerikan Frank Shkreli "ÇFARË KA TË BËJË KONSTANDINI ME VIKTIMAT E KOMUNIZMIT NË SHQIPËRI?", dhe thashë faleminderit Zotit që do të ketë gjithnjë shqiptarë të ndershëm që t'i shqiptojnë të vërtetat sado rrënqethëse qofshin, sepse vetëm përmes të vërtetave ne do të kryejmë detyrën ndaj atdheut dhe idealeve Euro-Atlantike.

Njëzet vjet pas rrëzimit të diktaturës në metropolin shqiptar, në Tiranë, nuk ekziston asnjë simbol që të kujtojë se ky vend dhe ky popull ka përjetuar diktaturën dhe terrorin më mizor në krahasim me vendet e tjera të ish-bllokut komunist, ku klasat politike kanë ndërmarrë veprime të përgjegjëshme, si duke i dënuar krimet e regjimeve totalitariste, ashtu edhe duke i shërbyer kujtesës për të mos i harruar kurrë viktimat.

Në Tiranë nuk gjen asnjë shenjë që të flet për dhimbjet dhe tragjeditë e një të shkuare të afërt, kur vetëm 24 vjet më parë poeti Havzi Nela u var sepse shkruante poezi dhe, pak më shumë se dy dekada më parë, në kufi u ekzekutuan me qindra shqiptarë, djem e vajza të reja, vetëm se tentuan të kalonin në Botën e Lirë, sepse klasa politike gjatë këtyre njëzet viteve tranzicion ka bërë gjithçka që kombi të përjetojë amnezinë.

Në Shqipëri nuk ka Shoah, nuk ka muzeume të krimeve të komunizmit, nuk ka memoriale, nuk ka kujtesë, nuk ka pendesë, nuk ka dënim të krimeve të komunizmit, nuk ka hapje të dosjeve, nuk ka zbardhje të së kaluarës, nuk ka ligj të Lustracionit, nuk ka votim për dorëzimin e imunitetit, nuk ka shtyp të lirë, ka vetëm luftë për të mbajtur pushtetin dhe luftë për të marrë pushtetin të dy krahëve kryesore të politikës të rrethuar nga një klikë partish të vogla, me hipoteka nga e shkuara, që riciklohen herë majtas e herë djathtas.

Po të të dëgjosh titujt e faqeve të para të përsëritura nga televizionet kombëtare, po të lexosh intervistat e deklaratat e personazheve kryesorë të tyre, duke filluar prej kuçedrës Nexhmije Hoxhës e të ish-eksponentëve të shtetit diktatorial, do të krijohet përshtypja se në Shqipëri nuk është rrëzuar sistemi komunist sepse ata që ishin dje në krye, sot janë përsëri në krye.

Në qershor të këtij viti në Tiranë zoti Besim Ndregjoni, Sekretar i Përgjithshëm i Integrimit të të Burgosurve dhe të të Përndjekurve politikë, duke marrë si shembull, Memorialin e Viktimave të Komunizmit në Washington D.C. me motivacionin se "historia e tiranisë komuniste duhet t'u mësohet gjeneratave të ardhme", e inauguruar më 12 qershor 2007 nga Presidenti George W.Bush, me rastin e 20 vjetorit të fjalimit të Presidentit Ronald Reagan përpara Murit të Berlinit, ku i bëri thirrje Gorbaçovit "rrëzoje atë Mur", organizoi një ekspozitë shumë të veçantë me titull: "Shqipëria kujton Eshtrat e tyre janë pa varr", duke vendosur në bulevardin "Dëshmorët e Kombit" fotografitë e 4500 viktimave të pafajshme, që u pushkatuan, u varën nga diktatura apo humbën jetën në burgjet e regjimit kriminal, të cilëve edhe sot e kësaj dite, nuk u janë gjendur eshtrat dhe kanë mbetur pa varr.

Ndërsa kjo ekspozitë do të duhej të përbënte ngjarje për jetën e një kombi që ka vuajtur të zezat, të cilit gazetat dhe TV e Tiranës ia marrin frymën me kronikën e zezë dhe kronikat rozë të mbushur me banalitete, kaloi pothuaj në heshtje të plotë.

Përveç telegramit të Kadaresë dhe pranisë së njërit prej Mandelave shqiptare, z.Adem Demaçi, i cili mori pjesë në inagurimin e saj, klasa politike e Tiranës bëri syrin qorr dhe veshin shurdh, sikur në Bulevardin Dëshmorët e Kombit të mos kishte ndodhur asgjë. Turp i tyre.

Asnjë politikan apo politikane nuk shkoi të vendoste një lule në fotografinë e Musine Kolakarit apo Bahri Omarit, asnjë nga politikanët e ashtuquajtur të djathtë nuk e vizitoi këtë ekspozitë që do të duhej të na trondiste të gjithëve, sepse ata njerëz të vrarë barbarisht e mbetur pa varr kanë 20 vjet që lypin drejtësi!

Ato 4500 fotografi të rreshtuara në Bulevardin Dëshmorët e Kombit, që përfaqësonin elitën e kombit shqiptar, të vrara nga një regjim monstruoz dhe të rivrara prej indiferencës, edhe prej fotografive akuzonin jo vetëm regjimin totalitarist, por edhe klasën politike të katapultuar këta 20 vjet në pushtet, e cila përmes heshtjes po i riekzekuton viktimat.

Në mesazhin që Kadare i dërgonte z.Ndregjoni shkruante "Shqipëria e sotme, koha, njerëzit, ndërgjegja e të gjithëve nuk mund të jetë e qetë pa kryer detyrimin moral ndaj të përndjekurve politikë. Ndaj kujtimit të atyre që vuajtën dhe që nuk janë mÃª në këtë botë. Ndaj gjithë të përndjekurve, që arritën të delnin prej ferrit të burgjeve dhe të internimeve."

Por klasa politike shqiptare ose hesht ose ashtu si thotë Frank Shkreli në analizën e tij "ÇFARË KA TË BËJË KONSTANDINI ME VIKTIMAT E KOMUNIZMIT NË SHQIPËRI?", "i përdor viktimat e komunizmit si një top futbolli, për interesa të përkohëshme politike e partiake", duke dëshmuar këta 20 vjet "mungesë të provave të sinqerta në lidhje me kujtimin e viktimave të komunizmit në Shqipëri".

Sepse Shqipëria nuk del gjëkund në të gjitha përpjekjet institucionale që ka marrë Europa dhe SHBA në lidhje me të shkuarën totalitariste dhe krimet e kryera nga regjime komuniste.

Këshilli i Europës, Bashkimi Europian, SHBA kanë ndërmarrë nisma në ndihmë të kujtesës, që gjeneratat që vijnë të mos harrojnë kurrë atë që kanë përjetuar prindërit, gjyshërit dhe stërgjyshërit e tyre.

Klasa politike shqiptare, institucionet e saj në vend që të distancohen nga krimet e diktaturës, janë të distancuara nga të gjitha përpjekjet që janë ndërmarrë nga institucionet europiane dhe nga ndërgjegja e pastër e elitës Perëndimore.

Në deklaratën e Pragës të vitit 2008 të inicuara nga Vaclav Haveli dhe presidenti aktual i Gjermanisë Joachim Gauck, në pikën 2 të saj, thuhet se "shumë krime të kryera në emër të Komunizmit duhet të vlerësohen si krime kundër njerëzimit që shërbejnë si një paralajmërim për brezat e ardhshëm, në të njëjtën mënyrë si krimet e Nazizmit që u dënuan nga Tribunali Nurembergut".

Ndërsa klasa politike shqiptare dhe Parlamenti i Shqipërisë ka reaguar me indiferencë të plotë ndaj thirrjeve që kanë bërë përfaqësuesit më të shquar të elitës europiane!

Dhe viktimat e komunizmit në Shqipëri, që edhe sot e kësaj dite, kanë mbetur pa varr dhe pa drejtësi, nga qielli ku ndodhen, shpirtrat e tyre akuzojnë klasën politike shqiptare! Me akuzat e tyre le të bashkohet çdo shqiptar i ndershëm që synon t'i lërë trashëgim brezave një Shqipëri demokratike, me qëllim që e djeshmja të mos përsëritet kurrë më!

SHKARKIMI I SHEFIT TË SHISH VEPRIM AUTODESTRUKTIV I SHEFIT TË EKZEKUTIVIT TË SHQIPËRISË
Nga ELIDA BUÇPAPAJ

E Premte, 08.10.2012, 10:16am

KA ARDHUR KOHA TË NDËSHKOHET KJO KLASË POLITIKE MIZERABËL!
Nga ELIDA BUÇPAPAJ
E Martë, 08.07.2012, 11:20am

PO NUK VOTUAN MË 6 GUSHT, ED RAMA « OUTSIDER »- PS DEL NË PENSION
Nga ELIDA BUÇPAPAJ
E Shtunë, 08.04.2012, 10:08am

MISTER, HESHTJE E PLOT PIKËPYETJE PËR VDEKJEN TRAGJIKE TË ALI PODRIMJES - SALI BERISHA DO TË DUHEJ TË ISHTE NË KONTAKT PREJ TË MARTËS ME PRESIDENTIN HOLLANDE Nga ELIDA BUÇPAPAJ
E Djelë, 07.22.2012, 10:56am

Çdo ditë një temë NËSE PS NUK VOTON MË 6 GUSHT, EDI RAMA BËHET « HARAKIRI » Nga ELIDA BUÇPAPAJ
E Martë, 07.17.2012, 12:31pm

Çdo ditë një temë
DORËZONI IMUNITETIN
Nga ELIDA BUÇPAPAJ

E Hënë, 07.16.2012, 09:57am

Çdo ditë një temë
MIMOZA KUSARJA
Nga ELIDA BUÇPAPAJ

Çdo ditë një temë JASHTË RRUGAÇËT NGA PARLAMENTI I SHQIPËRISË
-Si mund të tolerojmë që fyhet një nënë shqiptare si « rrugaçe »
Nga ELIDA BUÇPAPAJ

In Memoriam BEKIM FEHMIU NUK KA NEVOJË PËR LOTË KROKODILËSH Nga ELIDA BUÇPAPAJ
E Martë, 06.05.2012, 07:34am

SHQIPËRISË I DUHET PRESIDENTI NË MËNYRË EKSPLICITE SIPAS PROFILIT TË JOACHIM GAUCK Nga ELIDA BUÇPAPAJ
E Enjte, 05.17.2012, 02:07pm

DY FJALË PËR TAKIMIN E MBRËMSHËM TEK OPINION RAMA-FEVZIU ME DESTINACION ILIR METËN

Nga ELIDA BUÇPAPAJ