VOAL - Online Zëri i Shqiptarëve - VJEDHJA E BANKËS SË SHQIPËRISË - PROKURORIA FTON PËR BASHKËPUNIM DY TË ARRESTUAR

Vjedhja, prokuroria fton në bashkëpunim dy të arrestuar

TIRANE - Prokuroria e Tiranës u ka ofruar bashkëpunim dy prej të dyshuarve si të përfshirë në skandalin e vjedhjes së Bankës së Shqipërisë. Burime të sigurta nga ky institucion theksojnë se dy punonjësve të BSH, më konkretisht Petrit Ramohitajt, ish-përgjegjës i arkës në veprim dhe Bashkim Xhilagës, ish-përgjegjës për arkën stok dhe atë në veprim, u është ofruar mundësia e bashkëpunimit. Sipas burimeve nga grupi i hetimeve, dy punonjësit nuk kanë kthyer akoma një përgjigje përsa i përket bashkëpunimit. Ajo që dihet deri tani është fakti se organi i akuzës i ka ftuar dy punonjësit në bashkëpunim, me shpresën se ata do të pranojnë.

Përgjegjësitë
Burime konfidenciale sqarojnë se janë përzgjedhur pikërisht këta dy punonjës për t'u ofruar këtë mundësi, pasi janë dëgjuar edhe deklaratat e tyre, por edhe pas dyshimeve që ka grupi hetimor se dy punonjësit vërtet nuk kanë dijeni për vjedhjen që është bërë në bankë. Nëse Ramohitaj dhe Xhilaga do pranojnë që të bashkëpunojnë, atëherë prokuroria do kuptojë më mirë se çfarë ka ndodhur brenda mureve të Thesarit, pasi mendohet se dy personat mund të kenë të dhëna kyçe për hetimin, përsa i përket mënyrës se si kanë funksionuar gjërat. Organi i akuzës ka dyshime se dy ish-punonjësit e bankës nuk janë të implikuar drejtpërdrejt në vjedhjen e 713 milionë lekëve, por gabimi i tyre ka lidhje me mosveprimet e tyre, duke shpërdoruar në këtë mënyrë detyrën. Prokuroria ka dalë në këto dyshime paraprake, pasi edhe gjatë marrjes në pyetje, dy ish-përgjegjësit e arkave në BSH janë shprehur se nuk kanë pasur dijeni për ngjarjen dhe nuk kanë ditur se çfarë të bënin, pasi ata për shumë kohë kanë punuar pa rregullore dhe nuk kanë ditur se çfarë detyrash kanë pasur. Gjatë dëshmisë së tyre, Ramohitaj dhe Xhilaga kanë theksuar se e gjithë përgjegjësia, sipas tyre, qëndron tek eprorët. Në rrëfimin e parë të tyre, dy punonjësit pohuan se drejtuesit e kishin lënë Departamentin pa Rregullore dhe nuk kuptohej se çfarë detyre kishte njëri apo tjetri.

Ndërkohë, prokuroria ka nisur edhe verifikimin e të dhënave në sistemin TIMS për të parë hyrje-daljet e punonjësve të dyshuar si të përfshirë në vjedhjen e bankës.

Deri tani nga burime jozyrtare mësohet se ish-kreu i Thesarit në Linzë, Dorian Çollaku ka lëvizur shpesh jashtë vendit, kryesisht në Greqi, por ende nuk është zbuluar një lidhje e udhëtimeve të tij me itinerarin e parave. Nga grupi hetimor bëhet me dije se Çollaku ka lëvizur më shumë se 30 herë në drejtim të këtij shteti brenda 6 muajve të fundit. Ndërkohë, mësohet se të arrestuarit që ndodhen në burgun 302 dhe 313 në Tiranë nuk janë lejuar që të takohen nga avokatët apo edhe të afërmit e tyre.